Vlerësimi i gjakrrjedhjes te pacientët në terapi me barna antikoagulantë dhe antitrombocitarë

Nga Lara Figini

Pacientët adultë që janë në terapi kronike me barna antikoagulantë dhe antitrombocitarë, për sëmundjet kardiovaskulare ose sepse janë në risk për tromboemboli, po rriten gjithnjë e më shumë dhe prandaj gjithnjë e më shumë stomatologu duhet të kryejë ndërhyrje kirurgjikale orale që kanë risk për gjakrrjedhje më të madhe nëse merren këto barna.

Por a është risku i gjakrrjedhjes vërtet i madh në këto raste?

Tipologjia e kërkimit dhe modaliteti i analizës
Në një studim retrospektiv 6 vjeçar, të publikuar në Oral Surgery Oral Medicine Oral Pathology Oral Radiology në shtator 2019, autorët kanë grumbulluar të dhëna nga kartelat klinike elektronike të pacientëve që i janë nënshtruar procedurave periodontale invazive në College of Dentistry, Universiteti i Kentucky Lexington, nga data 1 janar 2011 deri në 1 prill 2017.

Janë përfshirë studime në të cilat është kryer një procedurë periodontale invazive, pra pacienti ka qenë në terapi farmakologjike kronike me antikoagulantë ose antitrombocitarë dhe është dokumentuar një vizitë kontrolli post-operative.

Rezultate
456 pacientë (grupmosha 22-89 vjeç; mosha mesatare 66,1 vjeç; 58% meshkuj) kanë përmbushur kriteret e përfshirjes dhe i janë nënshtruar 867 procedurave periodontale invazive.

Terapia farmakologjike me antikoagulantë dhe antitrombocitarë nuk është ndërprerë gjatë 484 procedurave të pastrimit të rrënjës dhe lëmimit të rrënjës, 218 pozicionimeve të implanteve, 53 lembove të hapura, 16 grafteve gingivale, 15 lembove me hapje laterale dhe 71 ndërhyrjeve të kirurgjisë periodontale invazive të një tjetër lloji.
Gjakrrjedhja post-operative është verifikuar vetëm pas 3 procedurave (0,35%) dhe është zgjidhur me hemostatik lokal.

Konkluzione
Ky studim ka treguar një risk shumë të ulët të gjakrrjedhjes që lidhet me marrjen kronike të antikoagulantëve ose antitrombocitarëve gjatë dhe pas procedurave periodontale invazive.

Implikime klinike
Ky studim ka treguar një risk shumë të ulët të gjakrrjedhjes që lidhet me marrjen kronike të antitrombocitarëve dhe antikoagulantëve gjatë dhe pas procedurave periodontale invazive.
Nga këtu i kanë fillesat rekomandimet për stomatologët që të mos ndërpresin këto barna përpara procedurave periodontale invazive.

Për më shumë informacione:
Rubino RT, Dawson DR 3rd, Kryscio RJ, Al-Sabbagh M, Miller CS. Postoperative bleeding associated with antiplatelet and anticoagulant drugs: a retrospective study. Oral Surg Oral Med Oral Pathol Oral Radiol. 2019 Sep;128(3):243-9.

Përktheu: Valbona Spahia