Tetraciklina në pjesën pas kirurgjisë së molarëve të tretë për të reduktuar riskun e osteitit alveolar: të dhënat e një studimi të fundit

Nga Lara Figini

Osteiti alveolar (OA) është një komplikacion i njohur mirë në kirurgjinë e molarëve të tretë mandibularë (3MS) dhe prevalenca është përfshirë nga 1% deri në 37,5%.

Blum ka përcaktuar OA si "dhimbje post-operative në brendësi dhe përreth pjesës së ekstraktimit, që rrit gravitetin në çdo moment ndërmjet ditës së parë dhe të tretë pas ekstraktimit, që shoqërohet nga një disintegrim parcial ose total i koagulit të gjakut në brendësi të alveolit me ose pa halitosis."

Falë antibiotikëve sistemikë (SAB) në trajtimet 3MS mund të reduktohet infeksioni post-operativ dhe fillimi i OA, por administrimi i SAB te pacientët e shëndetshëm është një argument shumë i diskutuar për shkak të rritjes së numrit të rezistencës bakteriale.

Prandaj, janë kërkuar strategji efikase alternative për antibiotikët sistemikë që mund të reduktojnë riskun e OA pas ekstraktimeve të molarëve të tretë. Në një nga këto alternativa të propozuara është një mjekim/drenim me garzë të zhytur në tetraciklinë që vendoset në alveolën post-ekstraktive.

Tipologjia e kërkimit dhe modaliteti i analizës
Në një studim klinik, të publikuar në Oral Surgery Oral Medicine Oral Pathology Oral Radiology në shtator 2019, autorët kanë studiuar efektin e një mjekimi me garzë të zhytur në oksitetraciklinë të vendosur më pas në alveolën post-estraktive në incidencën e osteitit alveolar (OA) dhe të dhimbjes post-operative gjatë javës së parë të ndërhyrjes kirurgjikale të ekstraktimit të molarit të tretë mandibular.

Dyqind pacientë i janë nënshtruar në mënyrë konsekutive një ndërhyrjeje ekstraktimi të molarit të tretë në anestezinë lokale janë randomizuar dhe ndarë në dy grupe:
• Grupi 1 ose grupi i drenimit (n=100), me një garzë të zhytur në oksitetraciklinë (Terramicina-Polimixina B, Pfizer, Pfizer Inc., New York, NY) që vihet në pjesën e ekstraktimit;
• Grupi 2 ose grupi i kontrollit (n=100) në të cilin është kryer një mjekim me bazë fiziologjiku në pjesën e ekstraktimit.

Një kirurg ekspert ka kryer ndërhyrjen kirurgjikale. Nuk janë përdorur antibiotikë sistemikë. Pas një jave është hequr te të gjithë pacientët mjekimi dhe penjtë.

Rezultate
Incidenca e OA ka qenë me 23% në Grupin e kontrollit dhe me 5% në Grupin e drenimit (P<.001). Risku për të zhvilluar OA ka qenë rreth 6 herë më i lartë në Grupin e kontrollit dhe femrat kanë manifestuar një risk 2,5 herë më të lartë në krahasim me meshkujt. Pacientët në grupin e kontrollit kanë pasur më shumë dhimbje në ditën e ndërhyrjes dhe në ditët pasuese (nga 4° deri në 7°).

Shfaqja e OA ka rezultuar e lidhur me përdorimin e vazhdueshëm të analgjezikëve (P<.001). asnjë pacient nuk ka pasur infeksione post-operative apo komplikacione të tilla që të kërkonin shtrimin në spital.

Konkluzione
Nga të dhënat e nxjerra nga ky studim, që duhet të konfirmohen me punime të tjera analoge, mund të dalim në përfundimin që mjekimi me oksitetraciklinë mund të reduktojë të mënyrë të konsiderueshme incidencën e OA pas ekstraktimit të molarëve të tretë inferiorë.

Strategjia e trajtimit të përshkruar, pa administrimin e antibiotikëve sistemikë, duket se është efikase në reduktimin në mënyrë kompleksive të sëmundshmërisë post-operative dhe të kohëve të shërimit pas ekstraktimit të molarëve të tretë mandibularë.

Implikime klinike
Reduktimi i sëmundshmërisë pas ekstraktimit të molarit të tretë mandibular është me rëndësi të madhe klinike në kirurgjinë orale. Kryerja e një mjekimi me garzë të zhytur në tetraciklinë është një mënyrë e thjeshtë dhe efikase për të reduktuar incidencën e osteitit alveolar dhe sëmundshmërisë së përgjithshme post-operatore.

Për më shumë informacione:
• Blum IR. Contemporary views on dry socket (alveolar osteitis): a clinical appraisal of standardization, aetiopathogensis and management: a critical review. Int J Oral Maxillofac Surg 2002;31:309-17.
• Øyri H, Jonsdottir O, Jensen JL, Bjørnland T. The use of a tetracycline drain reduces alveolar osteitis: a randomized prospective trial of third molar surgery under local anesthetics and without the use of systemic antibiotics. Oral Surg Oral Med Oral Pathol Oral Radiol 2019 Sep;128(3):205-12.

Përktheu: Valbona Spahia