|

Ndikimi i zhytjes në hipoklorit natriumi dhe i sterilizimit në autoklavë në rezistencën ndaj frakturave të instrumenteve në nikel-titan të trajtuar në mënyrë termike

Ja rezultatet e një kërkimi italian të raportuara nga Journal of Endodontics

Prof. Eugenio Pedullà, prof. Ernesto Rapisarda

Terapia endodontike akoma edhe sot është përcaktuar "kimio-mekanike" pasi përdor instrumente mekanike rrotulluese (si ata në nikel-titan) dhe me zgjidhje kimike irriguese (si hipokloriti i natriumit) me qëllimin për të përftuar dezinfektimin më të lartë të mundshëm të sistemit kanalar. Instrumentet kanalare në nikel-titan (NiTi) janë prezantuar në vitin 1988 për të kaluar ashpërsinë e atyre në çelik; megjithatë ka një perceptim të përgjithshëm që instrumente të tilla të kenë një risk të lartë për fraktura gjatë përdorimit të tyre. Prandaj prodhuesit kanë vazhduar përpjekjet për të përmirësuar cilësitë dhe rezistencën e tyre ndaj frakturës.

Fraktura e fileve NiTi mund të shkaktohet nga lodhja torsionale (përdredhëse) ose nga përkulja (kjo e fundit e njohur dhe si stresi nga lodhja ciklike). Ndër faktorët që mund të përmirësojnë rezistencën ndaj lodhjes klinike të instrumenteve NiTi janë trajtimet termike të aliazhit. Instrumentet endodontike në NiTi përdoren në prani të irriguesve si hipokloriti i natriumit në brendësi të kanaleve radikolare dhe shpesh ripërdoren duke pësuar procese të sterilizimit nga njëri përdorim në atë të radhës. Cilësitë korrozive të hipokloritit të natriumit mund të reduktonin rezistencën ndaj frakturës së instrumenteve NiTi; temperaturat e larta të përdorura gjatë procesit të autoklavës duke krijuar mundësisht një lloj trajtimi termik, mund të rrisin rezistencën ndaj frakturave të instrumenteve NiTi.

Prandaj, cili mund të jetë ndikimi i një apo i të dyja këtyre procedurave klinike (irrigimi dhe autoklava) mbi rezistencën ndaj lodhjes klinike të instrumenteve NiTi dhe në veçanti, të atyre të trajtuar në mënyrë termike?

Një studim in vitro i publikuar në Journal of Endodontics në prill 2018 është kujdesur për këtë argument dhe ka arritur në konkluzionin se cikle edhe të përsëritura të sterilizimit nuk kanë influencuar në lodhjen klinike të instrumenteve endodontike NiTi të trajtuara në mënyrë termike (CM-wire dhe R-phase) me përjashtim nga instrumentet Twisted Files (të fabrikuara me procesin termik R-phase) që kanë treguar një zvogëlim domethënës në rezistencën ndaj lodhjes ciklike pas 3 cikleve të sterilizimit. Zhytja në hipoklorit natriumi nuk ka reduktuar në mënyrë domethënëse rezistencën ndaj lodhjes ciklike të fileve të trajtuar në mënyrë termike që janë hetuar. Në veçanti autorët (italianë) të këtij studimi kanë marrë në konsideratë 210 instrumente të reja me diametër me majë 25 dhe taper .06 Twisted Files (trajtim R-phase) dhe Hyflex CM (trajtim CM-wire) duke i ndarë në 7 grupe (n = 15) për çdo markë:

• Grupi 1 (kontrolli), përfshin instrumentet e reja që nuk do të pësojnë asnjë trajtim;
• Grupet 2 dhe 3, përbëhen nga instrumente të zhytura në mënyrë dinamike për 3 minuta në solucionin e hipokloritit të natriumit 5% (fig.1) 1 dhe 3 herë, respektivisht;
• Grupet 4 dhe 5, përbëhen nga instrumente vetëm të futur në autoklavë 1 dhe 3 herë, respektivisht;
• Grupet 6 dhe 7, përbëhen nga instrumente që kanë marrë një cikël zhytje dinamike për 3 minuta në hipoklorit natriumi 5% ndjekur nga sterilizimi në autoklavë për 1 dhe 3 herë, respektivisht.

Fig.1 Hyflex CM #25.06 zhytur në hipoklorit natirumi 5% (zhytje dinamike - 500rpm - për 3 minuta)

Në vijim instrumentet i janë nënshtruar një prove të lodhjes ciklike duke regjistruar numrin e cikleve (rrotullimeve) të kryera nga instrumentet e testuara para se të thyheshin (NCF) në brendësi të një kanali artificial me kënd 60° dhe 5 mm rreze harkimi (fig.2).

Fig.2 Hyflex CM #25.06 në brendësi të kanalit artificial me kënd 60° dhe rreze harkimi të përdorur për testet e lodhjes ciklike

Gjithashtu, morfologjia e sipërfaqes së zonës së frakturuar të fileve NiTi të testuar është studiuar nëpërmjet mikroskopisë elektronike me skanim (SEM) (fig. 3) dhe analiza spektroskopike me dispersion të energjisë (EDS).

Fig.3 Pamje laterale në mikroskopin elektronik (SEM) të sipërfaqes së frakturës së Twisted Files pas 3 cikleve të përsëritura të zhytjes në hipoklorit dhe autoklavë

Nga rezultatet e përftuara nga studimi del në pah se zhytja në hipoklorit natriumi për 3 minuta (dhe e përsëritur 3 herë) nuk ka reduktuar rezistencën ndaj lodhjes ciklike të dy fileve të testuar (P>.05).

Megjithatë sterilizimi në autoklavë edhe pse nuk redukton në asnjë rast rezistencën ndaj lodhjes ciklike të Hyflex CV (P>.05), ka çuar në një tendencë më të madhe ndaj frakturës së Twisted Files vetëm kur përsëritet 3 herë, pavarësisht nga zhytja në hipoklorit natriumi (P<.05).

Analiza EDS ka treguar praninë e një shtrese të oksidit të sipërfaqes në Hyflex CM, ndërsa asnjë ndryshim morfologjik në SEM, apo kimik në EDS nuk është hasur midis fileve të së njëjtës markë që i përkasin grupeve të ndryshme.

Nga të dhënat e zbuluara nga ky studim in vitro, mund të përfundojmë se përdorimi i instrumenteve NiTi në prani të hipokloritit të natriumit nuk kompromenton rezistencën ndaj frakturës nga përkulja (lodhje ciklike) me instrumente të trajtuar në mënyrë termike si Twisted Files (R-phase) dhe Hyflex CM (CM-wire).

Sterilizimi në autoklavë në fakt ka prodhuar një përkeqësim të rezistencës ndaj lodhjes ciklike vetëm të Twisted files nëse përsëritet për 3 herë duke këshilluar një përdorim të kufizuar klinik.

Për më tepër:

• Pedullà E, Benites A, La Rosa GM, Plotino G, Grande NM, Rapisarda E, Generali L. Cyclic fatigue resistance of heat-treated nickel-titanium instruments after immersion in sodium hypochlorite and/or sterilization. J Endod 2018 Apr;44(4):648-653

Përktheu: Erjola Taga

Për të votuar duhet të vendosni kredencialet tuaja në Medikey

Interesant ( 71 votim / mesatar 3 )