Ozonoterapia dhe dhimbja muskulore kronike në çrregullimet temporomandibulare

Në gjendjen aktuale çrregullimet temporomandibulare (TMDs) rezultojnë se kanë një prevalencë që varion nga 5% në 12%. 65% e pacientëve të prekur nga këto çrregullime raportojnë dhimbje që lidhet shpesh dhe me një farë intensiteti që nuk duket se arrihet të mbahet nën kontroll me metodat tradicionale.
Me termin e përgjithshëm "Çrregullime temporomandibulare (TMDs)" mbyllet një seri problematikash klinike që kanë të bëjnë me artikulacionin temporomandibular (TMJ) dhe muskujt mastikator.

Etiologjia e TMD është multifaktoriale dhe mund të shkaktohet nga:

1. malokluzioni
2. traumat
3. bruksizmi
4. sinusiti
5. kapsuliti
6. osteoartroza
7. dëmtimet e brendshme të artikulacionit temporo-mandibular

TMD karakterizohen nga dhimbje, zhurma artikulare, lëvizje mandibulare e limituar por mbi të gjitha mialgji e muskujve mastikator.
Trajtimi i këtyre çrregullimeve shtrihet nga pllakat okluzale, në terapinë me laser, në stimulimin elektrik transkutan nervor. Si alternativë e këtyre metodikave kohët e fundit flitet gjithmonë e më shumë për terapinë me ozon që mund të inkuadrohet si një metodë minimalisht invazive për të reduktuar dhimbjen muskulore.
Sipas një studimi të publikuar në Journal of Oral Rehabilitation të qershorit 2017 terapia me ozon në fakt mund të merret në konsideratë si një alternativë ndaj metodave tradicionale në menaxhimin e dhimbjes muskulore mastikatore kronike në rastet e TMD duke lejuar një konsum më të vogël nga ana e pacientit të barnave kundër dhimbjes dhe relaksuesve të muskujve.
Në studim janë seleksionuar 40 femra me moshë mesatare 31,7 vjeç me diagnozë të sindromës së mosfunksionimit temporomandibular (RDC/TMD) me dhimbje muskulore kronike të rëndësishme. Pacientet janë ndarë në mënyrë rastësore në dy grupe:

A) Grupi Ozonit (OG; n= 20) ku pacientet kanë marrë terapinë e ozonit me frekuencë të lartë në pikën me dhimbjen më të madhe muskulore
B) Grupi Placebo (PG; n = 20) ku pacientet kanë marrë placebo në pikën me dhimbjen më të madhe muskulore

Ozoni dhe placebo janë aplikuar tre herë në javë për një total prej 6 sesionesh. Janë ekzaminuar lëvizjet mandibulare, relaksimi i muskujve mastikator dhe janë përftuar vlerat e pragut të dhimbjes nga presioni (PPT). Nivelet e pragut të dhimbjes subjektive janë vlerësuar duke përdorur shkallën analogjike VAS. Këto vlerësime janë kryer në kohën 0, pas 1 muaji dhe 3 muajsh.
Nga rezultatet e marra nga studimi autorët kanë mundur të konstatojnë se terapia me ozon ka reduktuar në mënyrë domethënëse intensitetin e dhimbjes duke shtuar vlerat e pragut të perceptimit të dhimbjes pas presionit (PPT) në mënyrë domethënëse nga koha 0 pas 1 muaji dhe 3 muajsh në krahasim me grupin placebo. Vlerat e PPTs të muskulit temporal dhe maseter pas 3 muajsh nga kontrolli, kanë rezultuar në mënyrë domethënëse më të larta në grupin OG në krahasim me grupin placebo. Lëvizjet mandibulare nuk kanë treguar ndryshime domethënëse midis grupeve të trajtimit përveç vlerave të ekskursionit lateral të djathtë pas 3 muajsh (OG = 8 · 90 ± 1 · 77, PG = 6 · 85 · 2 · 41, P = 0,003).
Me kufizimet e studimit në fjalë terapia me bazë ozonin mund të konsiderohet një alternativë ndaj metodave tradicionale ose që duhet të kombinohet me to, duke qenë një trajtim jo invaziv dhe relativisht i shpejtë dhe më i rehatshëm se trajtimi për shembull me pllaka okluzale. Ozonoterapia ka dëshmuar efekte pozitive në menaxhimin e dhimbjes së shkaktuar nga TMD dhe në përmirësimin e funksionalitetit mandibular. Studime të mëtejshme RCT me follow-up më të gjatë janë të nevojshme për të përcaktuar nëse këto rezultate kanë rëndësi klinike apo jo. Megjithatë duhet shtuar se dhe terapia me placebo ka dëshmuar përmirësime në parametrat e testuar prandaj duhet konsideruar se në këto rrethana një incidencë e mirë ndodh për shkak të komponentit psikologjik që nuk duhet të anashkalohet në terapinë e dhimbjes.

Nën kujdesin e: Lara Figini, Koordinatore Shkencore Odontoiatria33

Për më tepër:

J Oral Rehabil. 2017 Jun;44(6):442-451. Effect of high-frequency bio-oxidative ozone therapy for masticatory muscle pain: a double-blind randomised clinical trial. Celakil T, Muric A, Gokcen Roehlig B, Evlioglu G, Keskin H.

Përktheu: Erjola Taga