Aparatet transparente dhe kufizimet që kanë stomatologët e përgjithshëm

Terapia ortodontike përmes aparateve transparente (CAT) po bëhet gjithnjë e më e njohur pasi preferohet për trajtimin ortodontik fiks, si nga profesionistët, ashtu...

Terapia ortodontike përmes aparateve transparente (CAT) po bëhet gjithnjë e më e njohur pasi preferohet për trajtimin ortodontik fiks, si nga profesionistët, ashtu edhe nga pacientët, për shkak të avantazheve të tij të lidhura me rehatinë e estetikën, lehtësinë për mbajtjen e higjienës orale, ruajtjen e shëndetit dentar dhe periodontal dhe reduktimin e kohës së kaluar te stomatologu.

Më parë me CAT mund të trajtoheshin vetëm raste të thjeshta, por tashmë, kjo terapi është në gjendje të menaxhojë një gamë të gjerë malokluzionesh. Falë qasjeve dhe instrumenteve të tjera të veçanta (për shembull, minividat dhe kortikotomia), nëpërmjet CAT, aktualisht mund të trajtojmë pacientë me probleme të ndërlikuara, trajtimi i të cilëve përfshin shumë disiplina, siç janë pacientët para-protetikë dhe ortognatikë.

Megjithatë, mund të mos arrihet plotësisht lëvizshmëria dentare përmes trajtimit CAT, me shkallë të ndryshme parashikueshmërie për lloje të ndryshme të lëvizjeve të dhëmbëve. Në këtë rast, është e nevojshme që ortodontët të kenë aftësi dhe njohuri të larta mbi teknikat e avancuara të CAT.

Në literaturë shpjegohet se ortodontët me nivele të ndryshme formimi ortodontik, janë të ndryshëm në varësi të përvojës dhe të aftësisë së tyre në menaxhimin e pacientëve me aparate transparente dhe se ka ndryshime të dukshme në aplikimet klinike të CAT ndërmjet ortodontëve ekspertë dhe stomatologëve të përgjithshëm.

U konstatua se stomatologët e përgjithshëm, gjatë studimeve, kanë marrë formim të kufizuar përsa u përket diagnozave dhe trajtimit ortodontik dhe se profesionistët me formim të përparuar mbi aparatet, janë më të aftë në eliminimin e rreziqeve të mundshme. Prandaj, është thelbësore që profesionistët të kenë një edukim sistematik mbi CAT. Megjithatë nuk ekziston asnjë kurrikul ortodontike sistematike për të.

Sipas një studimi mund të thuhet se parashikueshmëria e lëvizshmërisë dentare, e vështirë për t'u arritur përmes terapisë me aparate transparente, mbivlerësohet shpesh nga profesionistët me përvojë të kufizuar klinike.

Së fundmi, duhet të promovohet një edukim i përshtatur për të gjithë profesionistët, përsa u përket aparateve të padukshme, veçanërisht në menaxhimin e rasteve të ndërlikuara dhe atyre të ekstraktimit.