Bruksizmi nokturn dhe bashkë-kontraktimi i muskujve mastikatorë dhe atyre të qafës

Nga Lara Figini

Bruksizmi nokturn (SB) është një aktivitet muskular mastikator i pavullnetshëm që kryhet gjatë gjumit dhe mund të jetë ritmik (fazik) ose jo ritmik (tonik). Prevalenca e tij është vlerësuar nga 5,5% deri në 12,8%.
Shenjat dhe simptomat kryesore janë të ndryshme, si gërryerja e dhëmbëve dhe dhimbja ose disfunksioni i artikulacionit temporo-mandibular. Gjatë mastikacionit, hapja dhe mbyllja ritmike e nofullës është e koordinuar mirë nga muskujt mastikatorë dhe cervikalë. Në rastet e mastikacionit të vullnetshëm bashkë-kontaktimi i muskujve mastikatorë dhe atyre të qafës kanë një nivel të lartë të bashkë-kontraktimit intermuskular edhe gjatë episodeve të aktivitetit muskular mastikator ritmik RMMA gjatë bruksizmit nokturn.

Tipologjia e kërkimit dhe modaliteti i analizës
Në një studim observues transversal, të publikuar në Journal of Oral Rehabilitation në prill 2020, autorët kanë vlerësuar bashkë-aktivitetin ndërmjet lëvizjes së nofullës dhe përqendrimit të muskujve të qafës gjatë bruksizmit nokturn.
Autorët kanë zbuluar aktivitetin elektromiografik të muskujve të nofullës (maseter, temporal) dhe të qafës (sternocleidomastoid, trapez) tek individët me bruksizëm nokturn të siguruar duke e matur nëpërmjet polisonografisë ambulatoriale (PSG).
Bashkë-kontraktimi i muskujve maseter-temporal, maseter-sternocleidomastoid dhe maseter-trapez është analizuar dhe matur gjatë mastikacionit ritmik fazik dhe atij të përzier duke përdorur një software të analizës së koherencës. Janë vlerësuar: prania ose mungesa e bashkë-kontraktimit të konsiderueshëm për episod (në përqindje), frekuenca e pikut të bashkë-kontraktimit (FPC) për episod dhe faza e gjumit.

Rezultate
Janë analizuar një total prej 632 episodesh me 16 PSG në tetë individë. Në 84,9% të episodeve është gjetur një bashkë-kontraktim i konsiderueshëm ndërmjet muskujve të nofullës dhe qafës.
Frekuenca e pikut të bashkë-kontraktimit të FPC së muskujve maseter-temporal ka rezultuar e lidhur pozitivisht me atë të muskujve maseter-sternocleidomastoid ose atë të maseter-trapez (P <.001). Fazat e ndryshme të gjumit nuk kanë ndikuar në mënyrë të rëndësishme bashkë-kontraktimin e këtyre çifteve të muskujve.

Konkluzione
Nga të dhënat e nxjerra nga ky studim, që duhet të konfirmohen me punime të tjera analoge, mund të dalim në përfundimin se gjatë bruksizmit nokturn kemi një bashkë-kontraktim të muskujve të nofullës dhe qafës, pavarësisht nga faza e gjumit.

Implikime klinike
Ky studim thekson rëndësinë e ekzaminimit të pjesës së sipërme të trupit si një sistem neuro-muskulo-skeletik global dhe unik dhe jo me sisteme të ndara. Për më tepër mbështet konceptin aktual të bruksizmit si fenomen që rregullohet në qendër.

Për më shumë informacione:
Gouw S, Frowein A, Braem C, de Wijer A, Creugers NHJ, Pasman JW, Doorduin J, Kalaykova SI. Coherence of jaw and neck muscle activity during sleep bruxism. J Oral Rehabil 2020 Apr;47(4):432-40.

Përktheu: Valbona Spahia