Çrregullimet e gjumit te fëmijët: shkaqet, pasojat dhe trajtimi

Nga Lara Figini

Studime të ndryshme në literaturë kanë nxjerrë që edhe te fëmijët gërhitja dhe apnea obstruktive e gjumit (OSA) janë të shpeshta, me një prevalencë 27% dhe 5,7% respektivisht. Risku i OSA është një problem edhe për fëmijët dhe është theksuar edhe në eventin e organizuar në Dhomën e Deputetëve nga On. Rossana Boldi.

Kjo problematikë trajtohet me detaje në një artikull të publikuar në European Journal of Paediatric Dentistry në mars 2019 nga prof. Luigi Paglia. Këto çrregullime të gjumit mund të lidhen me hipertrofinë adeno-tonsilare, alergjitë e rrugëve të sipërme ajrore, obezitetin dhe anomalitë dento-skeletike.

Pasojat klinike të çrregullimeve të gjumit te fëmijët janë përgjumja dhe çrregullimet konjitive, por edhe çrregullimet në sjellje gjatë ditës me rezultat shpërqendrimin në shkollë. Pasoja të tjera mund të jenë ndryshime në rritjen kranio-faciale, influencë negative në shëndetin e përgjithshëm dhe në zhvillimin e fëmijës. Ndaj apnea obstruktive e gjumit konsiderohet tashmë një sindromë neuro-komportamentale. Studime të shumta në literaturë kanë konsoliduar tashmë lidhjen ndërmjet obezitetit dhe çrregullimeve të gjumit që lidhen me respirimin në moshë pediatrike, si edhe komorbitetin ndërmjet OSA dhe bruksizmit nokturn.

Një shkak i rëndësishëm i OSA është rezistenca më e madhe e rrugëve të sipërme ajrore, që mund të vijë për shkak të pranisë së një qiellze të kontraktuar dhe mandibulë të vogël ose të retropozicionuar, hipertrofi adeno-tonsilare dhe ose një kombinim i atyre që u përmendën më lart. Të gjithë këto faktorë mund të identifikohen dhe trajtohen nga dentisti, në bashkëpunim me otorinolaringologun dhe pediatrin.

Pedodontistët kanë një rol të rëndësishëm në diagnozën e çrregullimeve të gjumit që lidhen me respirimin nëpërmjet vlerësimit të faktorëve predispozues skeletikë, veçanërisht në rastin e maksilës së kontraktuar dhe mandibulës së vogël dhe/ose të retropozicionuar. Trajtimi dentar dhe ortodontik, së bashku me vizitën te një otorinolaringolog dhe duke kontrolluar peshën trupore është në gjendje të zgjidhë problemin respirator dhe pasojat e mundshme klinike.

Për më tepër:
Eur J Paediatr Dent. 2019 Mar;20(1):5. Respiratory sleep disorders in children and role of the paediatric dentist. Paglia L.

Përktheu: Valbona Spahia