|

Krahasimi i cementeve kanalare: rezultate në biokompatibilitet

Endodoncia në vitet e fundit ka bërë hapa gjigante dhe kemi asistuar në komercializimin e shumë instrumenteve dhe materialeve të reja. Edhe në sektorin e cementeve kanalare gjendemi përballë inovacioneve të rëndësishme pasi po marrin gjithmonë e më shumë përparësi cementet kanalare bioaktive që përfaqësojnë një koncept të ri të mbushjes së rrënjës dhe ndërveprimi i tyre me indet periapikale është konsideruar përcaktues (Costa et al., 2016). Këto materiale të futur kohët e fundit janë silante endodntike me bazë të silikatit të kalciumit dhe dëshmojnë se prodhojnë përgjigje adekuate biologjike (Eldeniz et al., 2016, Prati & Gandolfi 2015). Në vitet e fundit në fakt studimet in vitro janë përqendruar në studimin e biokompatibilitetit të indeve periapikale me të cilat në mënyrë të pashmangshme vihen në kontakt (Accardo et al., 2014, Diomede et al., Camps et al., 2015).
Me citotoksicitet nënkuptojmë kapacitetin e një materiali për të influencuar në vitalitetin qelizor. Megjithatë testet e citotoksicitetit janë teste të biokompatibilitetit primar që përcaktojnë lizën e mundshme të qelizave, inhibimin e rritjes qelizore dhe efekte të tjera eventuale që ndryshojnë ciklet fiziologjike të qelizave të shkaktuara nga substanca ekzogjene në testim (Peters 2013).
Në një studim të publikuar në International Endodontics Journal të shtatorit 2017 krahasohet dhe vlerësohet citotoksiciteti i tre cementeve kanalare me bazë të silikatit të kalciumit: Bioroot BC Sealer (BR), Endoseal (ES) dhe Nano-ceramic Sealer (NCS) shiko tab. 1 për përbërjen e materialeve) të vëna në kontakt me qelizat staminale të ligamentit periodontal njerëzor dhe dëshmohet se Bioroot BC Sealer (BR) dhe Nano-ceramic Sealer (NCS) janë lidhur me një biokompatibilitet më të mirë në krahasim me Endoseal (ES).

Përbërja e Materialit

Tabela 1: përbërja e cementeve kanalare

Autorët kanë kultivuar qeliza staminale të ligamentit periodontal njerëzor në kontakt me tre cementet kanalare në fjalë për 24 orë. Vitaliteti qelizor është përcaktuar duke përdorur dozën MTT ((MTT Cell Growth Kit; Chemicon, Rosemont, IL, USA). Vdekja qelizore dhe ndryshimet e fenotipeve të induktuar nga cementet endodontike janë vlerësuar nëpërmjet citometrisë me fluks. Për të vlerësuar morfologjinë e qelizave dhe ngjitjen me cemente të ndryshme, qelizat njerëzore të ligamentit periodontal (hPDLSCs) janë mbjellë drejtpërdrejt në sipërfaqet e tre materialeve dhe janë analizuar nëpërmjet mikroskopit elektronik me skanim (SEM). Është kryer një analizë e variancës (anova) ndjekur nga një post-test Bonferroni (P<0,05).
Rezultatet e përftuara nga studimi janë si më poshtë:
Në 24 orë diferencimi qelizor ishte i dukshëm në prani të Bioroot BC Sealer (BR) dhe nano-Ceramic Sealer (NCS), po jo me Endoseal MTA (ES). Pas 72 orësh, BR dhe NCS kanë treguar respektivisht një përhapje qelizore të lartë dhe të moderuar, ndërsa ES ka dëshmuar shkallë të ulëta të përhapjes qelizore (P<0,05). Rezultate të ngjashme janë përftuar me testin e vdekjes qelizore. Qelizat periodontale hPDLSC mbanin fenotipin e tyre mezenkimal në të gjitha kushtet edhe nëse kapaciteti i tyre migrues ishte më i lartë në prani të BR. Në fund studimet SEM kanë shfaqur një shkallë të mirë përhapje, difuzion qelizor dhe ngjitje, mbi të gjitha kur janë përdorur disqe të BR dhe NCS në kontakt me qelizat periodontale.
Duke analizuar përbërje të ndryshme të këtyre tre cementeve kanalare dhe rezultatet e tyre në citotoksicitet në krahasim me qelizat e ligamentit periodontal mund të hamendësojmë se edhe mbushësit edhe dendësuesit mund të kryejnë dukshëm një rol të rëndësishëm për sa i përket biokompatibilitetit dhe nuk duhet të lihen pas dore në këtë sens.
Cementet kanalare Bioroot BC Sealer (BR) dhe Nano-Ceramic Sealer (NCS) nga ky studim in vitro kanë dëshmuar një biokompatibilitet të mirë me qelizat e lidhjes periodontale. Hetime të mëtejshme in vitro dhe in vivo janë të nevojshme për të krahasuar këto të dhëna dhe gjithashtu përshtatshmërinë e këtyre cementeve endodontike me bazë të silikatit të kalciumit për aplikimin klinik.

Nën kujdesin e: Lara Figini, Koordinatore Shkencore e Odontoiatria33
 
Për më tepër:
• Costa F,Sousa Gomes P,Fernandes MH(2016) Osteogenic and angiogenic response to calcium silicate-based endodontic sealers. Journal of Endodontics42,113-9.
• Eldeniz AU,Shehata M,Högg C,Reichl FX(2016)DNA double-strand breaks caused by new and contemporary endodontic sealers. International Endodontic Journal49,1141-51.
• Prati C,Gandolfi MG(2015) Calcium silicate bioactive cements: biological perspectives and clinical applications.Dental Materials31,351-70.
• Accardo C,Himel VT,Lallier TE(2014)A novel GuttaFlow sealer supports cell survival and attachment. Journal of Endodontics40,231-4.
• Diomede F,Caputi S,Merciaro Ietal. (2014) Pro-inflammatory cytokine release and cell growth inhibition in primary human oral cells after exposure to endodontic sealer. International Endodontic Journal47,864-72.
• Camps J,Jeanneau C,Laurent P,About I(2015) Bioactivity of a calcium silicate-based endodontic cement (BioRoot RCS): interactions with human periodontal ligament cells invitro. Journal of Endodontics41,1469-73.
• Peters OA(2013)Research that matters - biocompatibility and cytotoxicity screening. International Endodontic Journal46,195-7.
• Biocompatibility of three new calcium silicate-based endodontic sealers on human periodontal ligament stem cells. M. Collado-González,D. García-Bernal,R. E. Oñate-Sánchez,P. S. Ortolani-Seltenerich,A. Lozano, L. Forner,C. Llena,F. J. Rodríguez-Lozano International Endodontic Journal Volume 50, Issue 9 September 2017

Për të votuar duhet të vendosni kredencialet tuaja në Medikey

Interesant ( 58 votim / mesatar 3 )