Mikroskopi operativ gjithmonë e më thelbësor për një endodonci të suksesshme

Paaftësia për të identifikuar dhe trajtuar në mënyrë adekuate të gjithë sistemin kanalar, është një nga shkaqet kryesore të dështimit endodontik në distancë, me shfaqjen e mundshme të lezioneve periapikale që kanë nevojë për një manovër të mëtejshme stomatologjike, si ritrajtimi kanalar dhe nëse nuk është e mjaftueshme edhe për kirurgji endodontike retrograde.

Përdorimi i një mikroskopi operativ lejon identifikimin e kanaleve normalisht të vështirë për t'u lokalizuar dhe trajtuar në mungesë të një zmadhimi të avancuar. Shoqata Amerikane e Endodoncisë sugjeron se të gjithë endodontistët duhet të mësojnë të përdorin mikroskopin operativ dhe të inkorporojnë përdorimin e tij në praktikën e tyre stomatologjike të përditshme. Më specifikisht molari i parë superior paraqet një traumë endodontike shumë komplekse me një përqindje të lartë të pranisë së dy kanaleve në rrënjën meziobukale tashmë vetvetiu shumë e vogël. Studime transversale ndër-seksionale kanë nxjerrë në pah se molarët e trajtuar nga endodontistët që përdornin mikroskopin operativ garantonin shkallë mbijetese 10 vjeçare, në mënyrë domethënëse më të larta krahasuar me molarët e trajtuar nga endodontistët pa suportin e mikroskopit. Fatkeqësisht për këto studime është e vështirë të bëhet një ballafaqim dhe krahasim korrekt, për sa kohë janë prezente shumë variabla të tjera që mund të ngatërrojnë rezultatet finale, si diagnoza pulpare dhe periapikale pre-operatore, cilësia e trajtimeve RCT jo kirurgjikale, koha, cilësia e restaurimit post-operator dhe prania e patologjive sistemike që mund të influencojnë kryerjen e trajtimeve endodontike.

Mbi bazën e rezultateve të një studimi të kohëve të fundit të publikuar në "Journal of Endodontics", maj 2017 është bërë i mundur konstatimi që përdorimi i një mikroskopi operativ mund të përmirësojë kryerjen e trajtimeve kanalare jo kirurgjikale (NS RCT) në mënyrë domethënëse, mbi të gjitha në rastet elementeve dentare me kompleksitet anatomik.
Ky studim retrospektiv ka përfshirë molarët e parë superiorë (ETM) të trajtuar në mënyrë endodontike me trajtime të mëparshme të dukshme kanalare dhe restaurime adekuate të mbivendosura. Kriteret e përfshirjes kanë qenë: molarët e parë superiorë ETM të diagnostikuar me pulpit irreversibël dhe me inde periapikale normale para trajtimit fillestar kanalar jo kirurgjikal dhe që kanë paraqitur një minimum të një lezioni periaplikal të identifikueshëm (PAR) dhe një nga rrënjët në një moment të dytë në kohën e ritrajtimit.

Janë përfshirë 195 molarë të parë superiorë dhe janë ndarë në 2 grupe:
• grupi 1, ku NS RCT fillestare ishte kryer duke përdorur një mikroskop operativ (N=83) dhe
• grupi 2 , ku NS RCT ishte kryer pa suportin e një mikroskopi (n=112).

Janë nxjerrë të dhëna rreth pranisë së kanalit të dytë MB (MB2) dhe pranisë së një lezioni me ngarkesë të rrënjës mezio-bukale (MB PAR) në momentin e ritrajtimit.
Nga rezultatet e këtij studimi është bërë i mundur konstatimi se probabiliteti për të hasur sërish një lezion periapikal është 3 herë më i lartë në rastet në të cilat trajtimi kanalar fillestar ishte kryer pa përdorimin e një mikroskopi (P<0,05, Odds ratio = 3.1). Megjithatë nga të dhënat e përftuara është parë që ka një lidhje domethënëse midis një kanali MB2 jo të identifikuar dhe jo të trajtuar gjatë trajtimit të parë kanalar dhe shfaqjes së një lezioni periapikal me ngarkesë të MB PAR sidomos në grupin në të cilin trajtimet janë kryer pa ndihmën e mikroskopisë (P<0,05, raporti i probabiliteti = 5,1).
Në rastet në të cilat është kryer NS RCT fillestare duke përdorur mikroskopin, përjashtimi i kanalit MB2 nuk është lidhur me shfaqjen e një lezioni MB PAR.

Mikroskopi operativ bëhet gjithmonë e më shumë një nevojë për endodontistët, mbi të gjitha në rastet në të cilat kemi anomali kanalare komplekse dhe kjo ndihmë lejon reduktimin në mënyrë domethënëse të shfaqjes së lezioneve apikale me rend endodontik në distancë vitesh dhe shtimin e përqindjes së shërimit të tyre. Endodontistët gjithmonë e më shumë duhet të frekuentojnë kurse formimi për përdorimin e mikroskopit operativ dhe të operojnë në mënyrë të tillë që të pajisin studimin e tyre me një ndihmesë si kjo, tashmë thelbësore për një endodonci me një cilësi të shkëlqyer.

Nën kujdesin e: Lara Figini, Koordinatore Shkencore e Odontoaitria33

Për më tepër:
N Khalighinejad, A Aminoshariae, J C. Kulild, K A. Williams, J Wang and A Mickel, The Effectof the Dental Operating Microscope on the Outcome of Nonsurgical Root Canal Treatment: A Retrospective Case-control Study, JOE - Volume 43, Number 5, May 2017.