Endodoncia e drejtuar: pro-të dhe kundrat

Hapi i parë dhe thelbësor në trajtimet kanalare është përgatitja e kavitetit të aksesit. Forma optimale e këtij kaviteti duhet të mundësojë akses komod në kanale pa interferenca të kurorës por që duhet të jetë sa më shumë konservativ i mundshëm për të shmangur frakturat dentare që mund të ndodhin në të ardhmen. Ja pse ky hap i parë endodontik përveç se kërkon duar eksperte kërkon dhe shumë kohë për realizimin adekuat. Një kavitet me akses korrekt dhe të përshtatshëm jo vetëm që lehtëson dhe thjeshton hapat në vijim, pra forma dhe pastrimi kanalar, por redukton ndjeshëm dhe kohën. Kohët e fundit është folur shumë për implantologjinë e drejtuar, por e njëjta metodë mund të aplikohet dhe në endodonci dhe mund të flitet kështu për "Endodonci të drejtuar."
Një studim zvicerian i publikuar në "International Endodontic Journal" në tetor 2016, ka dashur të hetojë pikërisht aspektet pozitive dhe ato negative të endodoncisë së drejtuar dhe ndihmën efektive që kjo metodë inovative mund të garantojë për endodontistin, kryesisht në realizimin e një kaviteti optimal aksesi dhe më pas identifikimin dhe dhënien e formës së kanalit të rrënjës.

Autorët e këtij studimi kanë marrë në konsideratë 60 dhembë njerëzor të hequr për arsye periodontale, të cilët janë futur në gjashtë modele harkatash maksilare superiore. Para operimit kishin kryer skanime CBCT intraorale dhe të punuara nëpërmjet software-it coDiagnostixTM. Kavitetet e aksesit të çdo elementi dentar janë planifikuar virtualisht dhe më pas janë krijuar mostrat orientuese nëpërmjet stampuesve 3D, në mënyrë analoge me ato që kryhen për implantologjinë e drejtuar. Përgatitja e kaviteteve të aksesit është kryer nga dy operatorë të ndryshëm nëpërmjet mbështetjes në mostrat e krijuara.

Më pas janë realizuar skanime CBCT dhe janë mbivendosur për të vlerësuar se kur dizenjimi real i kaviteteve të aksesit të realizuara ndryshon në formë dhe dimensione nga kavitetet virtuale të planifikuara nga software.
Rezultatet e përftuara nga studimi janë si më poshtë: të gjithë kanalet e rrënjëve kanë rezultuar të aksesueshëm pas përgatitjes së kavitetit të aksesit me endodonci të drejtuar. Kavitetet e planifikuara virtuale dhe kavitetet e përgatitura të aksesit ndryshonin në mënyrë minimale në formë dhe dimensione, duke u luhatur nga 0.16 ne 0.21 milimetra për pjesën e kurorës dhe nga 0.17 në 0.47 mm për pjesën apikale. Nuk është vënë re ndryshim domethënës midis profesionistëve.
Nga ky studim del në pah se "Endodoncia e drejtuar" mundëson një përgatitje të kujdesshme të kavitetit të aksesit deri në apikalen e tretë falë mostrës së stampuar në 3D, duke reduktuar ndjeshëm variablën operator dhe duke bërë të gjithë kanalet e rrënjëve të aksesueshme pas përgatitjes së tyre.

Nëse nga një anë Endodoncia e drejtuar ka disavantazhin e kostove dhe kohëve të gjata, nga ana tjetër mund të jetë një ndihmesë e madhe për endodontistin mbi të gjitha në rastet e kanaleve të kalcifikuar dhe në mungesë të mikroskopit intraoperator.

Nën kujdesin e: Lara Figini, Koordinatore Shkencore Odonotiatria33

Përktheu: Erjola Taga