Endodoncia e drejtuar: E ardhmja? Nga literatura vijnë avantazhet dhe disavantazhet

Hapi i parë dhe thelbësor në trajtimet kanalare është përgatitja e kavitetit ku do ndërhyhet. Forma optimale e kavitetit duhet të lejojë futjen në kanale në mënyrë komode dhe pa interferime të kurorës por duhet edhe të jetë sa më konservative të jetë e mundur për të shmangur frakturat pasuese dentare. Ja përse ky hap i parë endodontik përveçse kërkon duart e një eksperti kërkon edhe shumë kohë për një realizim të përshtatshëm. Një kavitet aksesi korrekt dhe i përshtatshëm jo vetëm lehtëson dhe thjeshtëson hapat pasues pra formimin dhe pastrimin kanalar por edhe redukton në mënyrë të konsiderueshme dhe kohën. Së fundmi po flitet shumë rreth implantologjisë së drejtuar, por e njëjta metodikë mund të aplikohet edhe në endodonci dhe mund të flitet pra edhe për "Endodonci të drejtuar".

Një studim zvicerian i publikuar në International Endodontic Journal në tetor 2016 ka hetuar pikërisht aspektet pozitive dhe ato negative të endodoncisë së drejtuar dhe efektin ndihmues që kjo metodikë inovative mund t'i garantojë endodontistit kryesisht në realizimin e një kaviteti optimal për aksesin dhe më pas identifikimin dhe formimin e kanalit radikolar.
Autorët e këtij studimi kanë marrë në konsideratë 60 dhëmbë të hequr nga njerëzit për arsye parodontale të cilët janë futur në gjashtë modele të harkatave maksilare.

Përpara operacionit janë kryer skanime CBCT intra-orale dhe janë përpunuar nëpërmjet software coDiagnostixTM. Kavitetet e aksesit të çdo elementi dentar janë planifikuar virtualisht dhe më pas janë krijuar modele orientimi nëpërmjet një stampuesi 3D, në mënyrë analoge me atë që bëhet për implantologjinë e drejtuar. Përgatitjet e kavitetit të aksesit janë kryer nga dy profesionistë të ndryshëm nëpërmjet mbështetjes së modeleve të krijuara.
Më pas janë realizuar skanime CBCT dhe janë mbivendosur për të vlerësuar sesa ndryshon në formë dhe përmasa dizenjo reale e kavitetit të aksesit nga kavieti virtual i planifikuar nga software.

Rezultatet e marra nga studimi kanë qenë si në vijim: të gjitha kanalet radikolare kanë rezultuar të aksesueshëm pas përgatitjes së kavitetit të aksesit me endodoncinë e drejtuar. Kavitetet virtuale të planifikuara dhe kavitetet e aksesit të përgatitura kishin ndryshime minimale në formë dhe përmasa, duke u luhatur nga 0.16 - 0.21 mm për pjesën e kurorës dhe nga 0.17 - 0.47 për pjesën e apex-it. Nuk zbulohen ndryshime të rëndësishme midis profesionistëve.

Nga ky studim del që Endodoncia e drejtuar lejon një përgatitje të kujdesshme të kavitetit të aksesit deri në apex-in e tretë falë modelit të stampuar në 3D, duke reduktuar ndjeshëm ndryshueshmërinë e profesionistëve dhe duke i bërë të gjitha kanalet radikolare të aksesueshëm pas përgatitjes së vetë asaj.
Nëse nga njëra anë Endodoncia e drejtuar ka disavantazhin se ka kosto dhe kohë më të larta, nga ana tjetër mund të jetë një ndihmë e madhe për endodontistin mbi të gjitha në rastet e kanaleve të kalcifikuara edhe në mungesë të mikroskopit intraoperator.

Nën kujdesin e: Lara Figini, Koordinatore Shkencore e Odontoiatria33

Përktheu: Valbona Spahia