Efikasiteti antimikrobik i llojeve të ndryshme të shpëlarësve të kanaleve

Lara Figini

Objektivi kryesor i trajtimit të kanaleve  të rrënjës është eliminimi ose reduktimi i ngarkesës bakteriale në nivele të përputhshme me procesin e shërimit (Waltimo et al. 2005).
Edhe mjetet mekanike mund të reduktojnë në mënyrë të konsiderueshme ngarkesën bakteriale, anatomia komplekse e sistemit të kanaleve të rrënjës pengon efikasitetin e mjeteve, duke i dhënë shpëlarësve një rol kyç për dezinfektimin. Studime të ndryshme histopatologjike kanë treguar në fakt se komunitetet bakteriale mund të mbijetojnë në parregullsitë e kanaleve, si isthmus, kanale anësore ose tubtha dentinal (Nair et al. 1990).
Por cilat janë substancat që përdoren si shpëlarës që garantojnë efektin më të madh antibakterial, edhe kundër llojeve bakteriale më rezistente si Enterococcus faecalis, duke ofruar një aftësi të lartë të heqjes së shtresës së ndotjes të prodhuar gjatë procesit të pastrimit të kanaleve?
Në një studim të publikuar tek International Endodontic Jounal në dhjetor 2015 krahasohen llojet e shpëlarësve dhe zbulohet që efekti më i mirë antimikrobik garantohet nga hipokloriti i natriumit.
Më poshtë renditen disa lloje shpëlarësish të analizuar në studim:
1- Hipoklorit Natriumi (NaOCl)
Njihet se ka veti të lartë shpërbërjeje të substancës organike, duke siguruar një aktivitet po aq të lartë antimikrobial (Zehnder et al. 2002). Një disavantazh i hipokloritit të natriumit është paaftësia e tij për të eliminuar shtresën e ndotjes.
2- Solucioni i Hipokloritit të Natriumit i kombinuar me acid etidronik (NaOCl/ HEBP)
Për t'i paraprirë paaftësisë së hipokloritit të natriumit për heqjen e shtresës së ndotjes përdoret një solucion i hipokloritit të natriumit i kombinuar me një agjent kelatues të brishtë i njohur si acid etidronik (HEBP) (Zehnder et al. 2005). Solucioni NaOCl/HEBP zvogëlon shtresën e ndotjes dhe redukton grumbullimin e dendriteve të indit të fortë të prodhuara gjatë procesit të pastrimit (Lottanti et al., 2009, Paque et al. 2012).
3- Acidi paraacetik (PAA)
Përveç se ka veti dezinfektuese (Ordiola-Zapata et al. 2013), ka veti të mira të dobishme për heqjen e shtresës së ndotjes (De-Deus et al. 2011).
4- Klorheksidina (CHX)
Ky shpëlarës ka një aktivitet antibakterial (Shen et al. 2009, Baca et al.2012, Barrios et al. 2013) dhe aftësia për të frenuar aderimin e disa baktereve të dentinës (Kishen et al. 2008). Studime të fundit in vitro dhe in vivo kanë treguar se CHX siguron veti antimikrobike edhe mbi biofilmin e Enterococcus faecalis (Shen et al. 2009, Baca et al. Barrios et al. 2013 ).

Autorët kanë marrë në konsideratë shtatë molarë të njerëzve pa karies të cilët janë hequr dhe janë ruajtur në solucion timoli 0,1% në 4°C. Nga këto dhëmbë kanë hequr 25 blloqe dentine  pa smalt, të rregulluar me një kalibrues dhe të lustruar për të marrë mostra prej 2 x 2 x 1,2 milimetra (gjerësia x gjatësia x latësia). Shtresa e ndotjes e formuar gjatë përgatitjes së mostrave të dentinës është hequr duke i zhytur në EDTA me 17% për 5 minuta. Pas sterilizimit, janë mbajtur në solucion fiziologjik steril deri në momentin e përdorimit. Për formimin e biofilmit të E.faecalis është përdorur një mjet MBEC - me xhiro të mëdha (HTP) (Innovotech, Edmonton, Kanada) për të krijuar brazda mbi sipërfaqen e provëzave të dentinës të përgatitur në të cilat janë inokuluar rreth 1 x 107 koloni (CFU) për ml të E. faecalis të zhytur në 22 ml BHI. Biofilmi i E. faecalis është kultivuar në sipërfaqen dentinale të mostrave për 5 ditë dhe janë ekspozuar pra ndaj llojeve të ndryshme të solucioneve shpëlarës për 3 minuta. Uji i distiluar është përdorur si shpëlarës në grupin e kontrollit. Biovolumi total dhe përqindja e qelizave të vdekura të dentinës së infektuar janë matur nëpërmjet mikroskopit konfokal.
Nga rezultatet e marra në këtë studim del se NaOCl dhe përzierja NaOCl/HEBP garantojnë efektin më të mirë antimikrobial në lidhje me biofilmin e E. faecalis të ndjekur nga acidi paraacetik  PAA (P<0,05). Asnjë efekt i rëndësishëm antimikrobik i klorheksidinës CHX nuk është vëzhguar te grupi i kontrollit (Tabela 1)

Nën kujdesin e: Lara Figini, Koordinatore Shkencore e Odontoiatria33

Përktheu: Valbona Spahia

Për të votuar duhet të vendosni kredencialet tuaja në Medikey

Interesant ( 99 votim / mesatar 3 )