Ndryshimi i vlerave hemodinamike pas marrjes së benzodiazepinës. Literatura tregon dozat e duhura për kontrollin e ankthit

Shpesh ankthi dhe frika që duhet t’i nënshtrohen kurave stomatologjike çon pacientët në lënien pas dore të kontrolleve dhe shmangien e kurave stomatologjike

Lara Figini

Shpesh ankthi dhe frika që duhet t'i nënshtrohen kurave stomatologjike çon pacientët në lënien pas dore të kontrolleve dhe shmangien e kurave stomatologjike, prandaj tek këto pacientë hasim një incidencë më të madhe të patologjive dentare dhe orale.
Kontrolli i ankthit dhe frikës shpesh mund të arrihet nëpërmjet një bisede të thjeshtë por ndonjëherë kërkon përdorimin e ilaçeve.
Trajtimi që mundësisht më shpesh shkakton stresin dhe frikën është heqja e dhëmballëve të treta (dhëmballët e pjekurisë), që jo rrallë herë kërkojnë marrjen e ilaçeve anksiolitike për të reduktuar sasinë e shqetësimit nga ana e pacientit në lidhje me këtë lloj ndërhyrjeje kirurgjike dhe për të lejuar profesionistin të punojë me lirshmëri më të madhe.

Kontrolli i ankthin në mënyrë farmakologjike është një mjet i dobishëm dhe mund të kryhet me qetësi në një klinikë dentare me kusht që dentisti të kontrollojë me kujdes gjendjen e shëndetit të përgjithshëm të pacientit. Kjo paraqet një zgjedhje të sigurt, me kosto të ulët në krahasim me trajtimin e kryer me anestezi të përgjithshme në një mjedis spitalor. Anksiolitikët që përdoren zakonisht në klinikat dentare i përkasin kategorisë së benzodiazepinës dhe janë për shembull midazolam dhe diazepam.
Këto ilaçe ushtrojnë një farë ndikimi te disa parametra hemodinamikë, si presioni i gjakut dhe rrahjet e zemrës, siç kanë treguar studime të ndryshme në literaturë dhe më specifikisht një artikull i publikuar te Oral Maxillofacial Surgery në Shtator 2015.

Në këtë studim, të rastësishëm, janë analizuar dhe krahasuar ndryshimet hemodinamike pas marrjes së midazolam 7,5 mg dhe diazepam 10,0 mg te pacientët e shëndetshëm që i janë nënshtruar ndërhyrjeve kirurgjike të heqjes së dhëmballëve të treta në nofullën e poshtme. Janë përfshirë 120 pacientë dhe janë ndarë në tre grupe:
- Grupi 1 (diazepam dhe placebo),
- Grupi 2 (midazolam dhe placebo),
- Grupi 3 (diazepam dhe midazolam)
Çdo individ i është nënshtruar dy ndërhyrjeve kirurgjike të dhëmballëve të treta në nofullën e poshtme në raste të ndara në anestezi lokale.
Autorët kanë regjistruar dhe analizuar parametrat hemodinamikë: presionin sistolik, presionin diastolik dhe presionin mesatar të gjakut (SBP, DBP,e MBP, përkatësisht); frekuencën kardiake (FK); ngopjen me oksigjen (SpO2).
Parametrat e listuara më lart janë monitoruar 5 herë sipas intervaleve të mëposhtme:
T0: koha 0 bazë përpara marrjes së çdo ilaçi dhe përpara ndërhyrjes kirurgjike
T1: menjëherë përpara kryerjes së anestezisë
T2: 5 minuta pasi është kryer anestezia
T3: 10 minuta pasi është kryer anestezia
T4: në fund të ndërhyrjes
Rezultatet e arritura nga autorët janë si më poshtë: janë gjetur diferenca statistikisht të rëndësishme përsa i përket frekuencës kardiake në T2 dhe T3 (p<0,005) te grupi 2, me një normë më të lartë të verifikuar gjatë marrjes së midazolam kundrejt placebo. Diferencat e rëndësishme janë vënë re në T2, T3, T4 në të njëjtin grup, përsa i përket vlerat të presionit, me vlerat më të larta në mënyrë kontekstuale me marrjen e midazolam. Në Grupin 3 (diazepam dhe midazolam kundrejt njëra tjetrës), janë gjetur diferenca të rëndësishme në presionin diastolik te T3 dhe T4, me vlera më të larta të verifikuara me marrjen e diazepam. Përveç kësaj një frekuencë kardiake e lartë është verifikuar në T3 me midazolam. Ndërsa nuk është parë asnjë diferencë statistikore e rëndësishme përsa i përket ngopjes me oksigjen.

Marrja e ilaçeve anksiolitike si diazepam dhe midazolam për kontrollin e ankthit gjatë ndërhyrjeve stomatologjike mund të jetë një ndihmesë e madhe qoftë për pacientin në ankth qoftë për mjekun por këto ilaçe kanë njëfarë ndikimi te disa parametra hemodinamikë, si presion i gjakut dhe rrahjet e zemrës.

Dozat e këshilluara në këtë studim (midazolam 7,5 mg dhe diazepam 10,0 mg) konsiderohen ideale, sepse reduktojnë ankthin e shkaktuar nga ndërhyrja kirurgjike, duke lejuar bashkëpunimin e pacientit me komandat verbale të mjekut dhe tregojnë efekte anësore të përmbajtura dhe të kontrolluara në klinikë, efekte anësore që shënohen nga dozat e mëdha, ose kur këto ilaçe merren nga enët e gjakut.

Nën kujdesin e: Lara Figini, Koordinatore Shkencore e Odontoiatria33

Bibliografia:
Comparative study of hemodynamic changes caused by diazepam and midazolam during third molar surgery: a randomized controlled trial de Morais HH, Barbalho JC, de Holanda Vasconcellos RJ, Landim FS, da Costa Araújo FA, de Souza Dias TG. Oral Maxillofac Surg. 2015 Sep;19(3):267-73.

Përktheu: Valbona Spahia