Rënia e dhëmbëve të qumështit

Rënia e dhëmbëve të qumështit është një fenomen fiziologjik që fillon rreth moshës 6 vjeçare, me qëllim që t’i lënë vendin dhëmbëve të përhershëm.

Rënia e dhëmbëve të qumështit është një fenomen fiziologjik që fillon rreth moshës 6 vjeçare, me qëllim që t'i lënë vendin dhëmbëve të përhershëm.
Në zhargonin mjekësor, rënia dhe zëvendësimi i dhëmbëve të qumështit me ato të përhershëm quhet shkëmbim. Rënia e dhëmbëve të qumështit nuk vendoset me saktësi se kur duhet të ndodhë sepse tek disa fëmijë dhëmbi i parë bie në moshën 5 vjeç, ndërsa disa të tjerë i kanë ende të 20 dhëmbët e qumështit në moshën 7 vjeç.

Simptomat
Rënia e dhëmbëve të qumështit është një proces zakonisht pa dhimbje, që megjithatë mund të shkaktojë bezdi kur një dhëmbë qëndron i kapur pjesërisht te gingiva (ose lëviz). Herë të tjera dhëmbi mund të jetë thyer si pasojë e rrëzimeve ose tronditjeve (ngjarje të shpeshta te fëmijët): në të tilla raste dhëmbi mund të bjerë përpara kohe dhe procesi i shkëmbimit mund të pësojë disa ndryshime në kohë. Edhe pse, në situata fiziologjike, rënia e dhëmbit të qumështit nuk shkakton dhimbje te fëmija, gingiva mund të fryhet dhe të skuqet, sidomos në ditët para shpërthimit të dhëmbit të përhershëm. Nëse, në këto raste, fëmija thotë se ka dhimbje të gingivave, mund të këshillohet dhënia e paracetamolit (vetëm sipas këshillës së dentistit) që, përveç se zbut skuqjen parandalon edhe temperaturën. Në fakt, te disa fëmijë, dalja e dhëmbit të përhershëm pas rënies së atij të qumështit shkakton ngritjen e temperaturës trupore.
Edhe pse janë të destinuar të bien dhëmbët e qumështit kanë detyra të rëndësishme: lejojnë një përtypje efikase dhe një prodhim të tingujve në mënyrë të përshtatshme, drejtojnë dhëmbët e përhershëm në pozicionin e tyre të saktë dhe mbajnë një hapësirë të përshtatshme për zhvillimin e dhëmbëve të përhershëm. Pavarësisht frekuencës dhe rendit të rënies së dhëmbëve të qumështit nuk ka parametra konstantë te të gjithë fëmijët, por është mundur të pohojmë se dhëmbët e qumështit kanë tendecën të bien sipas rendit që kanë ndjekur kur kanë dalë. Së pari bien incizivët qëndror të poshtëm; më pas dy incizivët qëndror të sipërm, molarët e parë, kaninët, molarët e dytë e kështu me rradhë.

Nuk është ende e qartë arsyeja, por nga statistikat mjekësore mund të thuhet se rënia e dhëmbëve fillon më shpejt te femrat se te meshkujt.

Përktheu: Valbona Spahia