Imperfeksionet gingivare pas ndërhyrjeve implantologjike

Një në dy individë i kanë gingivat shumë të holla dhe kjo e shton rrezikun për rezultate estetikisht jo të pëlqyeshme pas një ndërhyrjeje implantare, nëse kjo e fundit nuk...

Një në dy individë i kanë gingivat shumë të holla dhe kjo e shton rrezikun për rezultate estetikisht jo të pëlqyeshme pas një ndërhyrjeje implantare, nëse kjo e fundit nuk programohet mirë. Më tej, është vlerësuar se pas 6 muajsh nga ndërhyrja jo e saktë, 60% e pacientëve mund të zhvillojnë shfaqje të tepërt të gingivave (gummy smile).

"Buzëqeshja me shfaqje të tepër të gingivave, ose 'gummy smile', është një patologji e lindur për pothuajse 10-12% të individëve dhe përkufizohet kështu kur gingivat janë të dukshme më shumë se 3 mm kur ata buzëqeshin. Shumë njerëz jetojnë me të pa u shqetësuar, por duke e kuptuar problemin gjatë rritjes, ai mund të korrigjohet me efikasitet, p.sh. me ndërhyrje gingivektomie të thjeshta pak invazive, për heqjen dhe ripozicionimin e indit gingivar të tepërt, nëse ky është shkaku i imperfeksionit. Mund të ndërhyhet edhe në mënyra të tjera, si me injeksionet e fillerave, ose botoksit, në mënyrë që buza e sipërme t'i mbulojë më tepër gingivat, por efektet kanë kohëzgjatje të kufizuar, duke u zhdukur pas gjashtë muajsh. Gjithashtu, me kalimin e viteve, në disa raste problemi zgjidhet vetë, pasi buza më e rënë fillon t'i mbulojë gingivat. Në një buzëqeshje perfekte, gingivat nuk janë të dukshme më shumë se 3 mm, duke filluar nga cepi i buzës së sipërme, të cilat duhet të jenë të shëndetshme, në ngjyrë rozë dhe uniforme", shpjegon presidenti i Shoqatës Italiane të Periodontologjisë dhe Implantologjisë (SIdP), Francesco Cairo.

Sipas SiDP, 50% e individëve kanë gingiva shumë të holla, një tipar anatomik që i bën ata më të rrezikuar nga tërheqja gingivare nëse kanë një implant dentar të projektuar keq. "Te këta persona, një implant i pozicionuar keq, e rrit me 14 herë probabilitetin për të zhvilluar shfaqje të tepër të gingivave, me rrënjë shumë të ekspozuara", specifikon Cairo.

"Një implant shumë i pjerrët, në rast gingivash të holla, shkakton tërheqje gingivare. Për shembull, për çdo gabim në pozicionim prej 10 gradësh, shtohet rreziku që gingiva të tërhiqet me 0.25 mm. Megjithatë, antidoti ekziston, thjesht duhet të konsultoheni me ekspertët. Përmes një projektimi të saktë tridimensional të pozicionimit të implantit, rreziku i vendosjes "shtrembër" do të zerohet dhe si pasojë edhe probabiliteti për probleme estetike të mëvonshme. Sidomos në rastet në të cilat implanti duhet të vendohet në një pjesë të dukshme dhe të rëndësishme nga ana estetike, është shumë e rëndësishme që të kryhet një vlerësim i kujdesshëm i trashësisë së indeve të buta dhe të forta, me qëllim vlerësimin e të gjitha detajeve për të shmangur që trashësia të ndikojë negativisht në rezultatet e ndërhyrjes.

Si përfundim, në rastet më të vështira me gingiva të holla dhe që implanti mund të ndryshojë buzëqeshjen, pavarësisht të gjithë kujdesit dhe masave të ndërmarra, mund të zgjidhet përdorimi i biomaterialeve specifike dhe grafteve gingivare, në të cilat indi i munguar rindërtohet duke marrë pjesë të vogla të indeve të buta nga qiellza dhe duke i futur ato në zonat që kanë nevojë për trajtim, duke shkaktuar formimin gradual të një shtrese të re gingivash. Në këtë mënyrë, nuk ndërhyn edhe në estetikën e buzëqeshjes, e cila në fakt përmirësohet.