Riakutizimet pas ritrajtimeve endodontike jokirurgjikale: incidenca dhe faktorët shoqërues

Qëllimet kryesore të trajtimeve endodontike, përfshirë edhe ato jokirurgjikale (NSRetx), janë eliminimi i dhimbjes dhe infeksionit nga dhëmbët e pacientëve dhe sigurimi i një gjendje të shëndetshme periapikale.

Riakutizimet karakterizohen nga fillimi ose përkeqësimi i dhimbjes së rëndë postoperative dhe/ose ënjtjes pas trajtimit endodontik dhe kërkojnë një takim urgjent me stomatologun.

Shfaqja e një riakutizimi shkakton gjithmonë stres dhe shqetësim si për pacientin ashtu edhe për dentistin dhe mund të ndikojë negativisht në marrëdhënien e tyre duke ulur pritshmëritë e pacientit, ndaj dëshira parësore e çdo endodonti është të shmangë këtë eventualitet.

Tipologjia e kërkimit dhe modaliteti i analizës

Në një studim grupor të publikuar në "Journal of Endodontics", autorët kanë përcaktuar incidencën, faktorët shoqërues dhe parashikueshmërinë e riakutizimeve pas ritrajtimeve endodontike jokirurgjikale (NSRetx).

Një riakutizim përkufizohet si shfaqja e dhimbjes së moderuar-të fortë me ose pa ënjtje, që ndodh brenda 14 ditëve nga fillimi i NSRetx, dhe kërkon një takim urgjent me dentistin.

Të gjithë pacientët (n=3666) që morën NSRetx nga tre endodontë gjatë një periudhe 6-vjeçare (2016-2022) u përfshinë në studim. U regjistruan të dhënat procedurale, demografike, diagnostike.

Për të identifikuar lidhjet e rëndësishme u kryen si analizat bivariate në të gjithë grupin dhe ashtu edhe ato multivariate për rastet me grup të plotë të të dhënave (n=2846). Për të krijuar një model parashikimi u përdor Algoritmi Random Forest.

Rezultatet

Incidenca e riakutizimeve rezultoi të ishte 3.95% (n=145). Rritja e rrezikut për riakutizime u shoqërua me diabetin (Raporti i rregulluar i mundësive [AOR]: 2.01, 95% intervali i besimit [CI]: 1.01-3.97); në dhëmbët mandibular (AOR:1.67, 95% CI:1.11-2.52); në rastet me dhimbje të moderuar-të rëndë para operacionit (AOR: 2.13, 95% CI: 1.31-3.50) dhe dhimbje në palpim (AOR: 1.63, 95% CI: 1.01- 2.64).

Një rrezik më i ulët për riakutizime u zbulua se lidhet me hipertensionin (AOR:0.44, 95% CI:0.210.82) (p <0.05). Modeli i parashikimit nuk ishte në gjendje të parashikonte riakutizimet me besim të mjaftueshëm (saktësia=0.13).

Konkluzionet

Nga të dhënat e këtij studimi, të cilat duhet të konfirmohen edhe në punime të tjera të ngjashme, mund të konkludohet se incidenca e riakutizimeve pas ritrajtimeve endodontike jokirurgjikale është e ulët (~4%) dhe ka një lidhje ndonëse të dobët, domethënëse me diabetin.

Implikimet klinike

Dentisti duhet të jetë i vetëdijshëm se disa patologji sistemike mund të predispozojnë shfaqjen e riakutizimeve pas ritrajtimit endokanalar jo-kirurgjikal. Megjithatë, ato janë të vështira për t'u parashikuar në këtë kontekst klinik.

Për më shumë informacion:

Ali Nosrat, Michael Valancius, Sahar Mehrzad, Omid Dianat, Prashant Verma, Anita Aminoshariae, Ashraf F. Fouad. Flare-ups after non-surgical retreatments: incidence, associated factors, and prediction. https://doi.org/10.1016/j.joen.2023.07.004.