Kanalet e patrajtuara dhe dështimi në endodonci

Nga Simona Chirico

Një kanal radikolar i patrajtuar është një nga shkaqet e dështimit në endodonci. Mungesa e dezinfektimit dhe vulosjes së një kanali radikolar mund të përcaktojë praninë e një rezervuari bakteresh, që mund të çojnë në periodontit apikal kronik dhe të ndikojë në trajtim.
Një kanal i patrajtuar gjatë trajtimit endodontik mund të jetë rezultat i njohjes së limituar të anatomisë së dhëmbit nga ana e profesionistit, e kompleksitetit në konfigurimin e kanalit ose të gabimeve procedurale (si një projektim i përshtatshëm i kavitetit të aksesit). Pra, cila është lidhja ndërmjet dështimit në endodonci me praninë e lezioneve periapikale dhe mungesës së trajtimit të një kanali?

Tipologjia e kërkimit dhe modaliteti i analizës
Baruwa ka kërkuar që t'i përgjigjet kësaj pyetjeje me një studim të tijin të publikuar në Journal of Endodontics në janar 2020. 1160 TC Cone beam, të kryera nga 8 qendra shëndetësore të ndryshme, janë vlerësuar nga janari 2018 deri në dhjetor 2018, në mënyrë të pavarur nga 5 profesionistë.
2305 dhëmbë të trajtuar në mënyrë endodontike janë identifikuar në një kampion prej 20.836 dhëmbësh (27.046 rrënjë). Të gjithë dhëmbët e trajtuar në mënyrë endodontike janë vlerësuar për praninë ose mungesën e kanaleve radikolare që mungojnë ose lezionet periapikale.
Testi Z për proporcionet është përdorur për të analizuar diferencat ndërmjet grupeve dhe një raport i probabilitetit është llogaritur për të analizuar lidhjen ndërmjet kanaleve që mungojnë dhe lezioneve. P <.05 është konsideruar statistikisht i rëndësishëm.

Rezultate
Prevalenca e kanaleve të patrajtuar ishte 12,0% dhe dhëmbët me kanale të patrajtuara lidheshin me patologjinë periapikale në 82,6% të rasteve. Rrënja që paraqet përqindjen më të lartë të kanaleve të patrajtuar (62,8%) ishte ajo meziobukale e molarit të parë maksilar, që lidhet me lezionet periapikale në 75,2% të rasteve.
Rrënjët meziobukale të molarëve maksilarë që paraqisnin një kanal të patrajtuar kishin një probabilitet 3,1 herë më të madh që të lidheshin me një patologji periapikale në krahasim me molarët maksilarë me të gjitha kanalet e identifikuara dhe të trajtuara.

Konkluzione
Duke marrë në konsideratë këtë studim, është e pranishme një prevalencë e lezioneve periapikale në mungesë të trajtimit të kanaleve radikolare. Kjo influencon dhëmbët e trajtuar në mënyrë endodontike. Për këtë arsye është e rëndësishme që të njohim anatominë e dhëmbëve, konfigurimet e kanalit radikolar dhe variacionet e mundshme, përpara se të fillojmë një trajtim endodontik.

Për më shumë informacione:
Baruwa AO, Martins JNR, Meirinhos J, Pereira B, Gouveia J, Quaresma SA, Monroe A, António Ginjeira A. The influence of missed canals on the prevalence of periapical lesions in endodontically treated teeth: a cross-sectional study. J Endod 2020;46(1):34-9.e1.

Përktheu: Valbona Spahia