Fëmijët dhe furça e dhëmbëve nuk janë miq të mirë

Vështirë të besohet që ende në ditët e sotme anashkalohet fakti që një higjienë e mirë orale dhe një stil korrekt ushqyerje të praktikuar që në fëmijëri shmangin vizitat e shpeshta te dentisti në vitet në vijim.

Të shumta janë kërkimet që konfirmojnë se fëmijët dhe furça e dhëmbëve nuk janë shumë miq. Kërkimi i fundit është kryer në provincën e Pistoia-s për një projekt që ka pasur si qëllim promovimin e shëndetit oral dhe parandalimin e kariesit.
Rezultatet e sondazhit, që është kryer në një kampion me 694 fëmijë në moshë shkollore të marrë nga 8 struktura të shkollave tetëvjeçare janë seleksionuar nga një kampion me 6301 fëmijë. Për të realizuar këtë sondazh është shpërndarë një pyetësor i përbërë nga katër pyetje të thjeshta që lidheshin me frekuencën me të cilën fëmijët lanin dhëmbët, ndërronin furçën, konsumonin vakte të ndërmjetme dhe ëmbëlsira, si edhe sa shpesh shkonin te dentisti. Rezultatet që janë marrë kanë evidentuar një praktikë të dobët të higjienës orale (68,1% e individëve kryenin larjen e dhëmbëve të paktën dy herë në ditë) dhe një mënyrë të ushqyeri kompleksive me konsumim mjaft të shpeshtë të vakteve të ndërmjetme dhe ëmbëlsirave. Në veçanti ka qenë interesante të zbulonim frekuencën e përdorimit të furçës së dhëmbëve gjatë ditës krahasuar me vaktet kryesore që ka rezultuar si në vijim: 27,6% pas mëngjesit; 9,1% pas drekës; 33,9% pas darkës; 29,4 % pas tre vakteve. Në lidhje me frekuencën e ndërrimit të furçës 59,5% e ndërronin çdo 4 muaj dhe 46,9% kryenin vizita stomatologjike çdo vit.

"Këto rezultate," - shpjegon Corrado Catalani, përgjegjës i Njësisë operative të edukimit shëndetësor, - "rezultojnë jashtëzakonisht të dobishëm për të gjurmuar orientimet strategjike të ardhshme në lidhje me parandalimin primar të kariesit odontogjen: duhet zgjeruar përfshirja e familjarëve në termat e formimit dhe informimit të fëmijëve për të shtuar për shembull përdorimin e furçës së dhëmbëve edhe pas drekës. Thelbësor është edhe roli i kryer nga pediatrët, aleatët tanë kryesorë në projekt, për të nxitur praktika të mira higjienike."

Objektivi ka qenë sensibilizimi i fëmijëve dhe prindërve të tyre drejt parandalimit oral.
"Edhe nga pikëpamja ekonomike," - vijon Catalani, - "aksesi ndaj kurave bëhet i vështirë për shkak të kostove pa llogaritur kohën që duhet t'i kushtojnë familjarët, pra 3 apo 4 orë pune të humbura që mënyrë që të shoqërojnë fëmijën në klinikën dentare."

Përktheu: Valbona Spahia