Përditësimi i planifikimit terapeutik të irrigimit dhe mjekimit intrakanalar në trajtimin e kanalit të rrënjës

Një rishikimi i literaturës

Nga Massimo Gagliani

Suksesi i trajtimit endodontik vjen nga eliminimi i plotë i mikroorganizmave në pjesën intraradikolare.
Për të arritur një çrrënjosje më efikase të këtyre mikroorganizmave, instrumentet endodontike duhet të pasohen gjithmonë me një irrigim të bollshëm, që duhet të arrijë efekte kimike, mekanike dhe biologjike.
Solucionet e irrigimit që përdoren më shumë sot janë:
• Hipokloruri i natriumit (NaOCl) në përqendrime të ndryshme;
• Klorheksidina (CHX);
• EDTA ose agjentë kelatues si acidi maleik (MA);
• Agjentë antibakterialë specifikë (QMix, Tetraclean);
• Një përdorim i veçantë i hidroksidit të kalciumit (CaOH) në fazën ndërmjet takimeve;
• Paramonoklorofenoli i kamforuar (CPMC) që lidhet me CaOH.

Këto solucione likide duhet të hidhen në kanalet radikolare nëpërmjet shiringave dhe ageve por me teknika të ndryshme, si agjitacioni manual i konit të gutaperkës, presioni apikal pozitiv ose negativ, aktivizimi sonik ose ultrasonik apo aktivizimet me laser si PIPS ose PDT.

Tipologjia e kërkimit dhe modaliteti i analizës
Në këtë rishikim, të publikuar në Journal of Clinical and Experimental Dentistry në shkurt 2019, objektiv i autorëve ishte përditësimi mbi solucione të ndryshme të irrigimit dhe barnave për dezinfektimin intrakanalar, si edhe stabilizimi i një protokolli irrigimi përgjithësisht efikas në trajtimin endodontik.
Është kryer një kërkim sistematik i artikujve shkencorë në bazën e të dhënave PubMed, Medline dhe Google Scholar, me fjalët kyçe: Protokolli i Endodoncisë, Infeksioni, Probleme, Irrigim, Ristrukturim dhe Irrigim.

Kriteret e përjashtimit ishin artikujt dhe "case report" me një datë publikimi përpara vitit 2000. Janë analizuar 48 artikuj që kanë përmbushur kriteret e inkluzionit.

Rezultate
Duke krahasuar artikuj të ndryshëm mund të shihet se NaOCl është ende standardi i artë në termat e efikasitetit antimikrobial të menjëhershëm, i ndjekur nga CHX që ka një efekt antibakterial afatgjatë, por duhet të përdoret veçanërisht te ritrajtimet.
Si bar që duhet përdorur në trajtimet me shumë seanca është i këshillueshëm kombinimi i Ca(OH)2 me CPMC.
Protokolli i irrigimit më i përshtatshëm konsiston në përdorimin e një përqendrimi mbi 2,5% të NaOCl, të aktivizuar në mënyrë të përsëritur nëpërmjet ultratingujve, të ndjekur nga një larje finale me anë të një agjenti kelatues (7% MA ose EDTA).
Përdorimi i kujdesshëm i CHX 2%, për shkak të ndërveprimit me NaOCl mund të bëhet pasi kanali radikolar të jetë tharë plotësisht me tampon.

Për më tepër:
Prada I, Micó-Muñoz P, Giner-Lluesma T, Micó-Martínez P, Muwaquet-Rodríguez S, Albero-Monteagudo A. Update of the therapeutic planning of irrigation and intracanal medication in root canal treatment. A literature review. J Clin Exp Dent 2019 febbraio;11(2):e185-93.

Përktheu: Valbona Spahia