Cili është instrumenti më i mirë endodontik për të arritur glide path?

Një studim krahasues ka kërkuar që të gjejë përgjigjen

Nga Davis Cussotto

Preflaring është faza e eksplorimit dhe zgjerimit përgatitor të kanalit dhe rezulton të jetë përcaktuese në garantimin e një formësimi në harmoni me anatominë origjinale të kanalit radikolar dhe për të parandaluar thyerjen e instrumenteve rrotullues.
Deri në momentin që kjo fazë kryhej me file manualë, eksperienca e profesionistit influenconte shumë cilësinë dhe riskun e gabimeve dhe komplikacioneve. Instrumentet e reja rrotulluese në nikel-titan kanë preflaring jashtëzakonisht të standardizuar duke lejuar të gjithë profesionistët që të arrijnë një zgjerim përgatitor dhe një glide path, pra një rrugë praktike me mure kanalare të lëmuara përgjatë të cilave instrumentet në NiTi mund të rrëshqasin me lehtësi për të arritur gjatësinë e punimit.

Tipologjia e kërkimit dhe mënyra e analizës
Në numrin e gushtit të BMC Oral Health, Linxia Zheng, e Departamentit të Dentistrisë Konservative dhe Endodontike në Nanjing Medical University School of Stomatology të Jiangsu (Kinë), ka publikuar një studim krahasues ndërmjet glide path të realizuar me instrumente të ndryshme. Kërkuesit kanë studiuar 60 kanale radikolare të molarëve të parë mandibularë që janë ekstraktuar.
Përgatitja e glide path është realizuar me 3 grupe instrumentesh (20 kanale për çdo grup): K-file (instrumente manuale tradicionale në çelik), PathFile dhe ProGlider (instrumente rrotulluese në NiTi).
Është testuar gjithashtu sistemi WaveOne (Dentsply Sirona) i përbërë nga instrumente rrotulluese reciprok NiTi që i kombinuar me ProGlider lejon modelimin e plotë të kanaleve radikolare edhe atyre të lakuar.
Sipas Zheng ky kombinim instrumentesh redukton transportin kanalar dhe kohët e punimit në krahasim me K-file dhe PathFile. Transporti kanalar - pra reduktimi i murit kanalar në anën e jashtme të pjesës apikale për shkak të tendencës së instrumenteve kanalare për t'u rikthyer në formën e tyre origjinale - është matur në tre grupet e kampioneve me rx në 3D me 1, 3, 5 mm nga apeksi radikolar.
Me një algoritëm është llogaritur vëllimi radikolar (Tabela I).

Tabela I

Niveli i transportimit	K-file	PathFile	ProGlider
1 mm	0,0280 ± 0,0041 mm	0,0201 ± 0,0045 mm	0,0181 ± 0,0036 mm
3 mm	0,0205 ± 0,0023 mm	0,0164 ± 0,0031 mm	0,0148 ± 0,0027 mm
5 mm	0,0117 ± 0,0033 mm	0,0070 ± 0,0021 mm	0,0056 ± 0,0022 mm
Rritja e vëllimit	0,4771 ± 0,0987 mm3	0,4467 ± 0,1187 mm3	0,5530 ± 0,0710 mm3

Rezultate dhe konkluzione
Në bazë të të dhënave të marra nga studimi kërkuesit kanë diskutuar konkluzionet e mëposhtme përfundimtare:
• grupet ProGlider dhe PathFile kanë treguar një transport të kanalit në mënyrë të konsiderueshme më të ulët sesa grupi K-file në të gjitha nivelet;
• grupi ProGlider evidenton një rritje të vëllimit të kanalit në mënyrë të konsiderueshme më të madhe në krahasim me grupet e tjera;
• koha më e shkurtër e punimit arrihet në rastin e përdorimit të ProGlider dhe koha më e gjatë me K-file;
• ProGlider dhe PathFile kanë prodhuar më pak mbetje të nxjerra përtej apeksit në krahasim me K-file;
• përgatitja pasuese me sistemin WaveOne eliminon diferencat në rritjet e vëllimit të kanalit të shkaktuara nga përgatitja e glide path.

Për më tepër:
Linxia Zheng, Xiongfei Ji, Chengxi Li, Lulu Zuo, Xin Wei. Comparison of glide paths created with K-files, PathFiles, and the ProGlider file, and their effects on subsequent WaveOne preparation in curved canals. BMC Oral Health 2018;18:152.

Përktheu: Valbona Spahia