Hipomineralizimi i smaltit te dhëmbët e qumështit: paralajmërimi për shfaqjen e tij dhe te dhëmbët e përhershëm

Një studim brazilian përcakton lidhjen

Nga Figini Lara

Hipomineralizimi i smaltit molar-inciziv (MIH) është përcaktuar si një zhvillim defektoz i smaltit të dhëmbëve që prek të paktën një molar të parë të përhershëm, por mund të prekë dhe dhëmbët anteriorë.

Prevalenca e MIH varion sipas popullsisë së studiuar dhe lëviz nga vlera shumë të ulëta (2,5% në Kinë) në një prevalencë më të lartë se 40% në Australi dhe në Brazil.

MIH karakterizohet nga opaciteti i smaltit dentar që shkon nga i bardhë në ngjyrë kafe dhe mund të avancojë në një desintegrim të smaltit pas eruptimit; në rastet më të rënda, paraqet dhe ekspozimin dentinal.

Nga ana histologjike opaciteti në rastet e MIH shkaktohet nga një densitet më i ulët mineral dhe poroziteti rritet nga i bardhë në kaf. Klinikisht ky porozitet përcakton një risk më të madh për fraktura të elementit dentar në fjalë; gjithashtu, smalti poroz përfaqëson një barrierë për ngjitjen optimale të materialeve adezive.

Hiperndjeshmëria është simptomatologjia për të cilën ankohen më shpesh pacientët e prekur nga MIH. Studime të literaturës sugjerojnë se shfaqja e MIH mund të paraprihet nga prania e hipomineralizimit tashmë në dhëmbët e qumështit.

Tipologjia e kërkimit dhe mënyra e analizimit
Në një studim të publikuar në Pediatric Dentistry, nëntor/dhjetor 2017 vlerësohet prevalenca dhe korrelacioni midis hipomineralizimit të molarëve të dytë primarë (HSPM) dhe e kaninëve primarë (HPC) me hipomineralizim molar-inciziv (MIH) në dhëmbët e përhershëm në 1963 fëmijë brazilianë në moshë shkollore.

Kriteret dentare nga Academy of Pediatric Dentistry (EAPD) janë përdorur për të vlerësuar rezultatet nga HSPM/HPC dhe MIH. Vetëm fëmijët me katër molarë të parë të përhershëm dhe tetë incizivë janë marrë në konsideratë në llogaritjen e prevalencës së MIH (n = 858); për prevalencën e HSPM/HPC janë marrë në konsideratë vetëm fëmijë me katër molarë të dytë primarë (n = 1590) dhe katër kaninë primarë (n = 1442). Për të vlerësuar marrëdhënien midis MIH/HSPM janë marrë në konsideratë vetëm fëmijët me të dy kriteret e cituara.

Rezultate
Prevalenca e MIH ka rezultuar të jetë 14,69% (126 në 858 fëmijë). Për HSPM dhe HPC prevalenca ka rezultuar respektivisht me 6,48% (103 nga 1592) dhe me 2,22% (32 nga 1442).

Është vërejtur një marrëdhënie domethënëse midis MIH dhe HSPM/HPC (P<0.001). Raporti i probabilitetit për MIH bazuar në HSPM ka rezultuar të jetë prej 6.31 dhe për HPC prej 6.02.

Konkluzione
Rezultatet e këtij studimi kanë çuar në konkluzionin se hipomineralizimi i molarëve të dytë të qumështit dhe i kaninëve të qumështit është i lidhur me shfaqjen e hipomineralizimit të molarëve të përhershëm, pasi fëmijët me HSPM/HPC kanë një probabilitet 6 herë më të madh për të zhvilluar MIH.

Implikime klinike
Diagnoza e hershme e HSPM dhe HPC te dhëmbët e qumështit është e rëndësishme për dentistin në mënyrë që të identifikojë pacientët më në risk për të zhvilluar MIH te dhëmbët e përhershëm.
Për fat të keq aktualisht etiologjia e MIH nuk është akoma plotësisht e përfshirë as nuk është i disponueshëm një trajtim që të mund të parandalojë në mënyrë efikase frakturën pas eruptimit (PEB).

Prindërit duhet të njoftohen për riskun e lidhur midis hipomineralizimit te dhëmbët e qumështit dhe atë te dhëmbët e përhershëm. Gjithashtu identifikimi i hershëm i hipomineralizimit te dhëmbët primarë mund të lejojë adoptimin e masave parandaluese.

Për më tepër:
• Da Silva Figueiredo Sé MJ, Ribeiro APD, Dos Santos-Pinto LAM, de Cassia Loiola Cordeiro R, Cabral RN, Leal SC. Are hypomineralized primary molars and canines associated with Molar-Incisor Hypomineralization? Pediatr Dent 2017 Nov 1;39(7):445-9.

Përktheu: Erjola Taga