Diskromitë dentare nga tetraciklina. Cilat janë zbardhimet më efikase në kushtet e shtëpisë?

Konsumi i tetraciklinës gjatë formimit të indeve dentare mund të çojë në një efekt anësor të papëlqyer nga pacientët që konsiston në diskromi të përhershme dentare. Prevalenca e dhëmbëve me diskromi për shkak të konsumit të tetraciklinës (TST) është vlerësuar të jetë 3-6% [Sanchez 2004] dhe mund të përgjithësohet ose lokalizohet dhe në ngjyrë të ndryshueshme nga e verdhë e hapur, në gri, në kafe të errët me pamjet tipike me vija. Manifestimi klinik varet nga lloji i tetraciklinës së konsumuar, nga doza, nga kohëzgjatja e konsumit dhe nga periudha e zhvillimit të indeve të dhëmbëve.

Trajtimi klinik i këtyre diskromive TST për të përmirësuar aspektin estetik varion në: zbardhim dentar me faseta në rezinë kompozitë ose porcelan me kurora në metal qeramikë me mbulim total ose në qeramikë integrale.
Zbardhimi është opsioni i trajtimit më konservativ pa sakrifikuar substancën dentare po me përftimin e një shkalle të mirë të kënaqësisë së pacientëve. Gjithashtu, sistemet e zbardhimit me bazë të peroksidit të karbamidit dhe peroksidit të hidrogjenit kanë dëshmuar se janë klinikisht të sigurt pa efekte anësore të pakthyeshme dhe me një kosto biologjike minimale.
Pranë trajtimit tipik klinik të zbardhimit profesional ekzistojnë trajtimet e zbardhimit në kushtet e shtëpisë që kryhen në shtëpi nga pacientët nëpërmjet përdorimit të maskerinave ku brendia e tyre mbushet me xhelin zbardhues ose nëpërmjet përdorimit të shiritave zbardhues.
Sipas një studimi të Haywood et al. të vitit 1994, 1997 dhe 2003, duke kryer trajtime zbardhimi në kushtet e shtëpisë me peroksid karbamidi xhel 10%, për një periudhë prej 6 muajsh, efektet zbardhuese dentare zgjasin deri në 90 muaj duke shfaqur deri në këtë periudhë një feedback pozitiv të pacientëve. Të njëjtët autorë kanë vërejtur gjithashtu se përballë një çngjyrimi në gingivën marginale të dhëmbëve, kishte një prognozë për zbardhimin.

Por në rastet e diskromisë nga tetraciklina, cili lloj zbardhimi në kushtet e shtëpisë rezulton të jetë më efikas? Ai me përdorim të maskerinave të mbushura me xhel, apo ai me përdorimin e shiritave?
Një studim të randomizuar i kontrolluar klinik, i publikuar në Journal of Dentistry në dhjetor 2017, diskuton pikërisht këtë tematikë duke krahasuar efikasitetin e trajtimit zbardhues me 15% peroksid karbamidi të vendosur në maskerinë duke e krahasuar me një trajtim zbardhues duke përdorur shiritat me peroksid hidrogjeni 6,5% në individë me TST. Individët e pranueshëm janë gjykuar në mënyrë të pavarur nga dy ekzaminues dhe janë caktuar në mënyrë rastësore në grupin 1 të maskerinave me xhel (N. 12) ose në grupin 2 të shiritave (N. 14).
Me një kolorimetër janë vlerësuar:
• shkëlqimi (L *)
• reduktimi i ngjyrës së kuqe (a *)
• reduktimi i ngjyrës së verdhë (b *)
në kohën fillestare 0, pas 1, 2 dhe 3 muajsh.
Çdo efekt anësor që lidhej me zbardhimin është regjistruar.
12 dhe 14 pjesëmarrës janë caktuar respektivisht në grupin 1 dhe në grupin 2. Në të dy grupet autorët kanë hasur një përmirësim të dukshëm dhe domethënës të L *; a * dhe b * pas tre muajsh në krahasim me kohën 0 (p <0,05).
Një përmirësim domethënës është vërejtur në muajin e parë për grupin 1 (p <0,05) dhe në dy muajt e parë për grupin 2 (p = 0,01).
Nga ky studim klinik është shfaqur se sistemet e zbardhimit në kushtet e shtëpisë prodhojnë efekte zbardhuese të mira te dhëmbët me diskromi nga tetraciklinia dhe nuk ka ndryshim domethënës në rezultatin estetik final midis dy metodave të zbardhimit në kushtet e shtëpisë (me maskerinë/ xhel dhe me shirita) në tre muajt e parë (p <0,05). Gjithashtu asnjë efekt anësor domethënës nuk është vërejtur nga këto trajtime.

Nën kujdesin e: Lara Figini, Koordinatore Shkencore Odontoiatria33

Për më tepër:
• A.R. Sanchez, R.S. Rogers, P.J. Sheridan, Tetracycline and other tetracycline-derivative staining of the teeth and oral cavity, Int. J. Dermatol. 43 (10) (2004) 709-715.
• V.B. Haywood, R.H. Leonard, C.F. Nelson, W.D. Brunson, Effectiveness, side effects and long-term status of nightguard vital bleaching, J. Am. Dent. Assoc. 125 (9) (1994) 1219-1226.
• V.B. Haywood, R.H. Leonard, G.L. DICKINSON, Efficacy of six months of nightguard vital bleaching of tetracycline-stained teeth, J. Esthet. Restor. Dent. 9 (1) (1997) 13-19.
• R.H. Leonard, V.B. Haywood, D.J. Caplan, N.D. Tart, Nightguard vital bleaching of tetracycline-stained teeth: 90 months post treatment, J. Esthet. Restor. Dent. 15 (3) (2003) 142-153.
• A randomized controlled trial of home bleaching of tetracycline-stained teeth. Botelho MG, Chan AWK, Newsome PRH, McGrath CP, Lam WYH. J Dent. 2017 Dec;67:29-35

Përktheu: Erjola Taga