Efikasiteti i zbardhimit dentar të dhëmbëve, varet nga karakteristikat optike të smaltit

Procedurat e zbardhjes dentare janë shumë të kërkuara nga ana e pacientëve por në veçanti të propozuara edhe nga stomatologët edhe nga higjienistët dentar.
Principi mbi të cilin bazohet procedura e zbardhimit dentar është që të heqë substancat kromogjene që janë akumuluar në hapësirat inter-prizmatike të matriksit të reduktuar organik të smaltit ekzistues midis një prizmi dhe tjetrit.

Shkurtimisht është mirë që të kujtojmë se smalti zotëron 98% të porcionit mineral të organizuar në prizma - përveç pak mikronëve sipërfaqësor jo prizmatik - dhe 2% komponentë organikë, kryesisht amelogenine.
Publiciteti, mesazhet e mediave por mbi të gjitha kërkesat e pacientëve dhe në disa aspekte besimet e profesionistëve, janë se nëpërmjet zbardhimit dentar (qoftë ky profesional ose në kushtet e shtëpisë) dhëmbët mund të bëhen të bardhë si ato të parë nëpër revistat glamour ose në televizion.
Qasja sipërfaqësore nga ana e profesionistit për propozimin e zbardhimit dentar, apo plotësimin e kërkesave të pacientit, mund të çojë në kontestime verbale me vetë pacientin që mund të shikojë të veniten pritshmëritë e tij për sa i përket trajtimit të cilit i është nënshtruar.
Mundësia për të përftuar ose jo dhëmbë të bardhë në vijim të trajtimit zbardhues varet nga natyra e ndryshme e smaltit si subjekt dhe objekt.

Nga pikëpamja optike gjejmë një smalt dentar të quajtur translucent që do të thotë që lejon që të shikojmë përtej - në lidhje me trashësisë e tij në zona të ndryshme të dhëmbit - ngjyra (chroma) e dentinës nën të.
Në të kundërt është e mundur që të gjejmë një smalt të përkufizuar opaleshent që, në fakt, shfaqet opak dhe me tendencë në të bardhë dhe që maskon plotësisht chroma-n e dentinës nën të, përveç zonave ku është shumë i hollë si në ato cervikale.

Parametri optik që përcakton translucencën dhe opaleshencën e smaltit quhet vlerë dhe te raca njerëzore gjejmë një smalt dentar me vlera plotësisht të ndryshme, nga ai me vlerë më të lartë, që do të thotë shumë e bardhë, në atë me vlerë shumë të ulët, që do të thotë në parim gri dhe që lejon në zonat në të cilat është i hollë që të perceptojë chroma-n e dentinës nën të.
Pikëpamja e këtij artikulli të shkurtër bazohet pikërisht në vlerësimin preliminar që stomatologu apo higjienisti dentar duhet të bëjë në meritë të vlerës së smaltit, gjatë vizitës së parë me pacientin dhe para se të propozojë apo pranojë kërkesa të procedurave të zbardhimit dentar.
Nëse smalti është translucent dhe i pigmentuar nga substanca kromogjene, zbardhimi dentar do të arrijë me siguri të heqë këto të fundit - dhe kështu të bëjë dhëmbin lehtësisht më të ndritshëm - por nuk mund të bëhet kurrë i bardhë.

Në të kundërt, nëse smalti është opaleshent dhe i pigmentuar nga substanca kromogjene, atëherë zbardhimi do të jetë shumë efikas në risjelljen e tij në vlerën më të lartë fillestare ose me tendencë ndaj të bardhës.
Ky koncept është i rëndësishëm për t'u njohur dhe profesionisti duhet të jetë në gjendje që të dallojë një smalt translucent nga një opaleshent që të dijë të përshtatet në propozimin apo në marrjen e kërkesave të pacientit për sa i përket zbardhimit dentar.

Debati, jo ligjor përgjithësisht midis mjekut dhe pacientit mbi çështjen e zbardhimit zhvillohet zakonisht mbi këto terma: doktori më ka kryer zbardhimin por dhëmbët e mi kanë mbetur në të njëjtën ngjyrë si në fillim.
Situata e përshkruar është shumë e shpeshtë por është edhe e thjeshtë për t'u shmangur duke paralajmëruar pacientin, në rastin kur ka një smalt translucent se procedura e zbardhimit nuk mund të bëjë kurrë dhëmbët e tij në ngjyrë të bardhë si ato të parë nëpër revistat me shkëlqim.

Përktheu: Erjola Taga

Fig. 1: shembull i incizivëve qendror me smalt translucent: smalti lejon që të shikohet përtej aty ku është i hollë, kontrasti i zi palatal (zona incizale) dhe chroma dentinale (zona cervikale)

Fig. 2: shembull i incizivëve me smalt opaleshent: smalti nuk lejon që të duket kontrasti i zi palatal gjithashtu dhe në nivel incizal chroma e dentinës jo transparente