Çngjyrosja e kallëpeve të ndryshme CAD/CAM pas zhytjes në kafe

Suksesi i restaurimeve në kompozitë në stomatologji varet jo vetëm nga karakteristikat mekanike dhe fizike por edhe nga performanca estetike. Mbi të gjitha nga pikëpamja e pacientit një restaurim i kënaqshëm duhet të paraqesë një korrespondencë të shkëlqyer ngjyre midis dhëmbit natyral dhe restaurimit, të jetë pra sa më imitues i mundshëm dhe të garantojë një qëndrueshmëri të vlefshme të ngjyrës përgjatë viteve. Materialet e restaurimit të zgavrës së gojës janë të ekspozuara ndaj faktorëve të shumtë dhe të shpeshtë që ndryshojnë kushtet orale, faktorë si: temperatura, lagështia, ushqimi, pijet dhe tymi që mund të çojnë në fenomene të diskromisë së restaurimeve në kompozitë.

Dihet se diskromitë mund të kenë shkaqe ekstrinseke (jothelbësore) dhe shkaqe intrinseke (të brendshme). Të parat përfaqësohen nga substanca ngjyruese si: kafeja, çaji, coca cola dhe vera e kuqe ndërsa shkaqet intrinseke janë të lidhura me përbërjen e matriksit në rezinë, me katalizatorin, modalitetin dhe kohëzgjatjen e polimerizimit me konvertimin e matriksit monomer, me granulometrinë dhe oksidimin e monomerit të pakonvertuar. Materialet kompozitë të përftuara nëpërmjet CAD/CAM duket se kanë një rezistencë ndaj dekolorimit/diskromisë shkaktuar nga procesi optimal i polimerizimit.

Në një studim të kohëve të fundit publikuar në "Restorative Dentistry and Endodonitcs" vlerësohen dhe krahasohen çrregullimet e ngjyrës dhe ndryshimet e translucencës së kallëpeve të kompozitës të realizuar me teknikën CAD/CAM dhe kallëpet e realizuara në mënyrë tradicionale pas zhytjes për periudha të ndryshme në kafe.

Autorët kanë realizuar tetë kallëpe me rezinë kompozitë me CAD/CAM dhe katër kallëpe me rezinë kompozitë konvencionale me trashësi 2,0 mm. Të gjitha kallëpet janë analizuar me një spektrofotometër në sfond të bardhë dhe të zi në kohën 0, pas një dite, një jave dhe pas një muaji që janë zhytur në kafe duke i krahasuar me ata të zhytur vetëm në ujë. Vlerat e secilit material janë analizuar nëpërmjet metodës ANOVA me dy rrugë.

Rezultatet e marra nga studimi kanë dëshmuar se gradimi i ngjyrës pas zhytjes në ujë nuk pëson ndryshime domethënëse, ndërsa pas zhytjes në kafe ndodhin ndryshime domethënëse në mënyrë më të theksuar me rritjen e kohës së zhytjes. Vlerat e ndryshimit kromatik (nga 1.6 në 3.7) në grupin CAD/CAM pas një muaji zhytje në kafe ishin në mënyrë domethënëse më inferiore se ato të përftuara në grupin e kallëpeve të realizuar në rezinë kompozitë konvencionale (nga 2,1 në 7,9). Megjithatë nga të dhënat e studimit është zbuluar se heqja e njollave në materialet e grupit CAD/CAM është e përftueshme pothuajse gjithmonë me lustrimin e thjeshtë me pastë profilaktike, gjë që në fakt nuk është kurrë e arritshme me kompozitat e realizuara me metodën tradicionale. Kjo sepse shkaku i diskromisë në grupin CAD/CAM është pothuajse totalisht i llojit ekstrinsek.

Nën kujdesin e: Lara Figini, Koordinatore Shkencore Odontoiatria33

Për më tepër:
Restor Dent Endod. 2017 Feb;42(1):9-18. Discoloration of various CAD/CAM blocks after immersion in coffee. Lauvahutanon S, Shiozawa M, Takahashi H, Iwasaki N, Oki M, Finger WJ, Arksornnukit M.

Përktheu: Erjola Taga