Zëvendësimi i një dhëmbi të vetëm me qasje mini invazive me implant me gjatësi të reduktuar dhe ngarkesë të menjëhershme

HYRJE
Implantologjia moderne ofron zgjidhje të ndryshme kirurgjikale dhe protetike për të riparuar mungesën e një dhëmbi apo harkata të tëra dentare. Implantet mund të vendosen njëherësh me ekstraksionin e elementit dentar me shërimin e indeve të buta në njësinë pa dhëmbë prej kohësh, si me teknika monofazike si me teknika bifazike. Edhe kohët e vendosjes së protezave mund të variojnë nga ngarkesa e menjëhershme (dërgimi i protezës brenda 24 - 48 orësh) në ngarkesë të vonuar tradicionale (3 - 4 muaj në rehabilitimin mandibular, 6 muaj në atë maksilar).
Interes më i lartë nga mjekët dhe pacientët i kushtohet ngarkesës së menjëhershme, në gjendje të mundësojë funksion dhe estetikë në një kohë sa më të shkurtër të mundshme. Suksesi i ngarkesës së menjëhershme fillimisht u dokumentua me rehabilitimin e mungesës totale të dhëmbëve mandibular dhe maksilar. Më pas autorë të shumtë dhe rishikime sistematike të literaturës kanë analizuar përqindjet e suksesit të implanteve me protezë të menjëhershme në rastin e mungesës së një dhëmbi dhe të mungesës parciale të dhëmbëve, duke bërë kështu zëvendësimin e elementeve dentare nëpërmjet implanteve zgjedhjen e parë terapeutike në situata të ndryshme klinike. Zhvillimi i sipërfaqeve të reja implantare së bashku me një makrogjeometri dhe me lidhje implanto-protetike më të mira kanë lejuar përftimin e një stabiliteti të mirë primar me torque adekuat të vendosjes dhe një rezistencë të lartë ndaj forcave transversale me reduktimin e lëvizjeve shumë të vogla (nën 150 μm) ndaj ndërfaqes implant-kockë, të afta për të përcaktuar një fibro integrim të implantit. Falë këtyre progreseve, mund t'i zihet besë implanteve me gjatësi të reduktuar (≤ 10 mm) duke reduktuar invazivitetin kirurgjikal, procedurat e rikonstruksionit kockor dhe komplikimet e mundshme intra dhe post operatore.
Qëllimi i këtij rasti studimor ishte vlerësimi i suksesit implantar dhe stabiliteti kockor margjinal në distancë prej një viti, i një implanti konik me dimensione të reduktuara (8,5 mm gjatësi) karikuar menjëherë për riparimin e mungesës së një dhëmbi mandibular.

MATERIALE DHE METODA
Një pacient mashkull me moshë 68 vjeçare, paraqiste mungesën e një dhëmbi në korrespondencë të premolarit të parë inferior djathtas, të ekstraktuar më parë për motive periodontale (fig. 1 dhe 2). Sondimi i dhëmbëve fqinj nuk shfaqte vlera patologjike me thellësi sondimi 3 mm. Pacienti nuk paraqiste kundërindikime sistematike apo lokale ndaj kirurgjisë dhe vendosi të rehabilitonte elementin mungues nëpërmjet një proteze të mbështetur në implant, pas marrjes së miratimit të informuar. Duke konsideruar anatominë në njësi u zgjodh që të vendosej një implant me dimensione të reduktuara (8,5 mm gjatësi).

TRAJTIMI
Pa anestezi, me adrenalinë (Afacaina 40 mg/ml solucion që injektohet me adrenalinë 1:100.000, Dentsply Italia, Roma) ngrihej një lembo me trashësi të plotë. Njësia kirurgjikale ishte përgatitur fillimisht me pjesën piezoelektrike OP 15 (Mectron Piezosurgery Device, Mectron, Carasco, GE) dhe në vijim osteotomia korrigjohej nëpërmjet frezave të kalibruara, duke u kujdesur që të mos mbi përgatitej njësia.
Pozicionohej një implant IS II Active (Neobiotech, Seul, Corea) me diametër 4,25 mm x 8,5 mm gjatësi dhe qafë të lëmuar në nivelin e kreshtës (fig. 3) duke matur torque të vendosjes nëpërmjet çelësit dinamometrik. Vlera e torque mbi 50 N cm lejonte vendosjen e menjëhershme të protezës. Kështu pozicionohej transfer i gjurmës rreth të cilit qepeshin lembot me suturë Monospeed 6/0 (Butterfly Italia, Cavenago Brianza, MB) dhe nxirreshin gjurmët në polivinil siloksan (Flexi-time, Heraeus-Kulzer, Hanau, Germania) (fig. 4).

Fig. 1 Pamja para operacionit

Fig. 2 Radiografia para operacionit

Fig. 3 Implanti i vendosur në nivelin e kreshtës

Fig. 4 Lembo të qepur përreth transfer për gjurmë të ripozicionueshme

Ditën tjetër dërgohej kurora provizore në rezinë akrilike me vidhosje direkte me izolim të vidës me 15 N cm, duke u kujdesur që ta mbajmë sa më pranë dhëmbëve antagonistë dhe në interkuspidim dhe lateralitet maksimal (fig. 5). I përshkruhej pacientit një terapi antibiotike (amoksicilinë + acid klavulanik cpr 1 g, 2 cpr në ditë) dhe antiinflamatorë (ibuprofen pluhur) për një javë dhe pas 15 ditësh hiqeshin penjtë.

Fig. 5 Kurora provizore me vidhosje direkte dorëzuar pas 24 orësh

Fig. 6 Kurora përfundimtare në metal-qeramikë

Fig. 7 Radiografia e kontrollit pas 12 muajsh: vihet re rimodelimi minimal kockor

Gjithashtu pacientit iu dhanë dhe rekomandime rreth mënyrës së ushqyerjes dhe higjienës orale në përgjithësi, duke këshilluar përdorimin e një spraji (Eburos Spray Clorexidina 0,20 Dentsply Italia) deri në heqjen e penjve dhe një furçe të butë. Një kontroll kryhej me heqjen e penjve, më pas në muajin e tretë dhe pas një viti nga ngarkesa protetike. Pas një periudhe shërimi prej 6 muajsh merreshin gjurmët për një restaurim përfundimtar dhe dërgohej monokoni përfundimtar (izoluar me 25 N cm) dhe kurora në metal-qeramikë cementuar në të, nëpërmjet cementit provizor (Temp-Bond, Kerr, Orange, CA, USA) (fig.6). Implanti më pas kontrollohej pas një viti nga ngarkesa protetike (fig. 7).

REZULTATE
Nuk janë regjistruar komplikime intra dhe/ose post operatore. Implanti ka dëshmuar qëndrueshmëri dhe ka qenë asimptomatik gjatë gjithë periudhës së vëzhgimit. Nuk është vënë re rimodelim kockor që tejkalonte kufirin e lëmuar dhe indet e buta perimplantare janë mbajtur në kushte të mira me një gërshetim dhe qepje pa asnjë shenjë të flogozës (inflamacion).

KONKLUZIONE
Riparimi i elementeve të vetme dentare mund të kryhet dhe me implante me dimensione të reduktuara, karikuar në mënyrë të menjëhershme kur janë të pranishme kushte ideale të stabilitetit primar dhe të përshtashmërisë së indeve të buta perimplantare, me një reduktim të risqeve, të komplikimeve të mundshme, të kohës dhe kostove. Studime të mëtejshme me një seri të gjerë dhe një periudhë më të gjatë follow-up do të jenë të nevojshme për të vlerësuar parashikueshmërinë e trajtimeve të tilla.

Përktheu: Erjola Taga

Burimi: Dental Cadmos