Mungesa e vitaminës D gjatë shtatzënisë e parapërgatit foshnjën për një rrezik më të madh të hipoplazisë së smaltit dhe kariesit

Një punim i fundit i shfaqur tek revista prestigjoze Pediatrics, ka lidhur mungesën e vitaminës D gjatë tremujorit të dytë ose të tretë të shtatzënisë me praninë e kariesit të regjistruar te fëmijët e moshës 1 vjeçare.
Duke u nisur nga supozimi se nivele të pamjaftueshme të kësaj vitamine te gratë shtatzënë mund të ndikojnë tek kalcifikimi i elementëve dentar të qumështit duke i parapërgatitur ndaj hipoplazisë së smaltit dhe fillimit të lezioneve të kariesit (Early Childhood Caries, ECC) është realizuar një studim me qëllim verifikimin e një kampioni me 207 gra shtatzëna me të tillë lidhje. Studimi është projektuar si një studim prospetik grupi dhe ka rekrutuar nënat e ardhshme nga një zonë urbane me ekonomi të ulët. Gratë shtatzëna i janë nënshtruar një serumi për përcaktimin e niveleve të 25-hidroksi vitaminës D, që paraqet formën më të përhapur qarkulluese të vitaminës D. Në moshën 1 vjeçare fëmijët i janë nënshtruar një vizite dentare nga ana e një ekzaminuesi "të verbër" në lidhje me vlerat e serumeve të vitaminës D të regjistruara te nënat shtatzëna.

33% e nënave të ardhshme paraqesin nivele të mungesës së kësaj vitamine. Hipoplazia e smaltit është gjetur te 22% e foshnjave që janë me gji, ndërsa 23% paraqiti lezione të kariesit në gojë. Nëse merren në konsideratë edhe fazat fillestare të patologjisë (white spot), një përqindje e tillë rritej me 36%. Nënat e fëmijëve me ECC paraqisnin nivele të vitaminës D shumë më të ulta se ato fëmijët e të cilave ishin pa karies (P= .05). Analiza statistike ka zbuluar që hipoplazia e smaltit (P< .001), fëmijët e vegjël (P= .002) dhe nivele të ulta të vitaminës D te gratë shtatzëna (P= .02) lidheshin në mënyrë të konsiderueshme me praninë e lezioneve të kariesit. Si përfundim, ky studim interesant ka konfirmuar që nivele të ulta të vitaminës D te nëna gjatë shtatzënisë mund të ndikojë negativisht te dhëmbët e qumështit të fëmijës, duke e parapërgatitur ndaj zhvillimit të ECC.

Ky studim ngushton pak rrethin në lidhje me një seri situatash që mund të parapërgatitin fëmijët më të vegjël ndaj kariesit. Në fakt një tjetër studim i fundit (Gernand AD, Simhan HN, Caritis S, Bodnar LM. Maternal vitamin D status and small-for-gestational-age offspring in women at high risk for preeclampsia. Obstet Gynecol. 2014;123:40-8.) ka pohuar që nënat me mungesë të vitaminës D gjatë shtatzënisë kanë një rrezik më të madh që ta lindin fëmijën me peshë të vogël në krahasim me peshën normale. Përveç kësaj është verifikuar tashmë që fëmijët me peshë të vogël kanë një rrezik më të madh se ato me peshë normale në praninë e hipoplazive të smaltit (Masumo R, Bårdsen A, Astrøm AN. Developmental defects of enamel in primary teeth and association with early life course events: a study of 6-36 month old children in Manyara, Tanzania. BMC Oral Health 2013 14;13:21) dhe prania e këtyre anomalive paraqet një faktor të rëndësishëm rreziku për fillimin e lezioneve të kariesit, veçanërisht tek individët që vijnë nga bërthama familjare me nivel të ulët socio-ekonomik.

Nga e gjithë kjo vihet në dukje qartësisht sesi patologjitë e gojës konsiderohen dhe përballohen gjithnjë e më shumë në një optikë më të përgjithshme të shëndetit.

Referime: Schroth RJ, Lavelle C, Tate R, Bruce S, Billings RJ, Moffatt ME. Prenatal Vitamin D and Dental Caries in Infants. Pediatrics. 2014 Apr 21.

Nën kujdesin e: Maria Grazia Cagetti, Qendra e Bashkëpunimit OMS për etiologjinë dhe stomatologjinë e komunitetit, Milano

Përktheu: Valbona Spahia