Të ushqyerit dhe komplikacionet e implanteve. Nga një studim në SH.B.A tregohen zakonet negative

Dështimi, frakturat dhe humbja e integrimit të implanteve kanë shkaqe multifaktoriale: këtë e vë në dukje Dennis Flanagan, stomatolog që ushtron aktivitetin e tij në Connecticut, në Journal of Oral Implantology në përfundim të një kërkimi me qëllim mbi të gjitha që të evidentohet roli që kanë zakonet e të ushqyerit.

Disa pacientë konsumojnë çdo ditë ushqime, si perimet e pagatuara dhe frutat e thata, që i kërkojnë nofullave të ushtrojnë një farë force për përtypjen, që prodhon në kockë një presion më të madh në krahasim me atë që verifikohet tek individët që preferojnë ushqime me konsistencë më të butë. Diferencën e bën shpeshtësia me të cilën prodhohet kjo mbingarkesë: nëse vazhdon për vite me rradhë, mund të ketë efekte negative në kockë dhe në metal.

Si një amerikan i mirë, Flegnan citon shembullin e kokoshkave, që përmbajnë ndonjë kokërr të pa pjekur mirë, por që çahet në gojë kur kafshohet: nëse kjo ndodh te dhëmbët e implantuar, prodhohen forca që pas një periudhe mund të prodhojnë një thyerje. Kjo është veçanërisht e rëndësishme kur një humbje kockore ka reduktuar raportin kurorë-implant. Përgjithësisht, mund të përdoren implante me diametër të gjerë për të shpërndarë më mirë ngarkesën, por në disa pjesë kjo nuk është e mundur dhe herë të tjera kortikalja kockore është shumë e hollë dhe nuk garanton një rezistencë të mjaftueshme. Kjo është veçanërisht për të stigmatizuar zakonin e disa personave për të përtypur akullin (pagofagia), zakon ky i rrezikshëm jo vetëm për shkak të ngurtësisë, por edhe për presionet që ushtrohen nga temperaturat e ulëta.

Flanagan për këtë arsye e sheh të përshtatshme që implantologët t'i rekomandojnë pacientëve të tyre një vëmendje më të madhe në krahasim me ato që kanë dhëmbët e tyre të shëndetshëm, por duhet vënë në dukje që ekziston një kufi i gjerë i pasigurisë dhe që nuk janë vendosur akoma parametra që mund të diferencojnë pacientët që janë në risk më të madh: "cilësia e kockës dhe volumi i nevojshëm për t'i rezistuar forcave okluzale që prodhohen nga përtypja e disa ushqimeve është sot i panjohur."

Adelmo Calatroni

Për më tepër: (*) Flanagan D. Diet and Implant Complications. J Oral Implantol. 2016 Jun;42(3):305-10.

Përktheu: Valbona Spahia