Të ruash sa më shumë të jetë e mundur strukturën origjinale të dhëmbit. FDI mbështet trajtimin minimalisht invaziv

Prej disa vitesh po përhapet e ashtuquajtura "stomatologjia minimalisht invazive", që përfshin ato teknika të konservativës që propozohen për të eliminuar vetëm indin karioz ose për të rivendosur pjesët e dhëmbit që nuk ekzistojnë më. Duke shfrytëzuar teknologjitë më të reja, arrihen kështu restaurime të integruara në mënyrë perfekte te dhëmbi, të padukshme dhe që zgjasin.

Me këtë trajtim është marrë së fundi edhe FederataDentare Ndërkombëtare (FDI) që, në kongresin e saj botëror të mbajtur në Poloni në mesin e shtatorit, ka nxjerrë një deklaratë për këtë temë, duke deklaruar se mbështet Minimal intervention dentistry si "mënyrë bashkëkohore e trajtimit të kariesit dentar."
Objektivi i saj, kujtojnë ekspertët e Federatës, është të ruajë sa më shumë të jetë e mundur strukturën origjinale të dhëmbit dhe të mbajë një funksionalitet për të gjithë jetën e pacientit: "ky aspekt është bërë gjithnjë e më i konsiderueshëm me zgjatjen e shpejtë të jetëgjatësisë; personat duhet të jenë në gjendje të gëzohen me vazhdimësinë e funksionalitetit të plotë të dhëmbëve edhe në moshën e tretë."

Mundësia për të arritur këto rezultate është falë teknologjive të reja. Tashmë janë të disponueshme instrumente kontrolli viziv dhe taktil dhe aparatura me udhëzues elektronik që lejojnë identifikimin e lezioneve karioze që nga fillimi si dhe monitorimin e aktivitetit dhe risqeve. Në bazë të këtyre të dhënave dentisti mund të veprojë një zgjedhje më të saktë midis opsioneve të ndryshme të trajtimit dhe personalizimin e ndërhyrjes me qëllim që të përshtaten masat më të mira për të mbajtur progresionin e kariesit.

Ndërhyrjet operative minimalisht invazive kufizohen në heqjen e smaltit dhe dentinës së butë, që redukton në minimum dimensionin e kavitetit që, nëse mbushet me material adeziv cilësor, do të lejojë jetëgjatësinë e dhëmbit. Provat shkencore kanë treguar vlefshmërinë e stomatologjisë minimalisht invazive që në disa raste ka sjellë marrjen në konsideratë të mbitrajtimit të atij tradicional.

Por FDI kujton që Minimal intervention dentistry duhet të bashkohet me një edukim të përhapur të higjienës orale: "procesi i demineralizimit mund të ndalohet në pjesën më të madhe nga vetë pacienti, me reduktimin e sasisë dhe shpeshtësisë së konsumit të sheqernave dhe me heqjen e biofilmit nëpërmjet masave të zakonshme të higjienës orale kuotidiane."

Adelmo Calatroni

Përktheu: Valbona Spahia