A është efikas filli dentar? Ekzaminimi i literaturës ushqen skepticizmin

Adelmo Calatroni

Filli interdentar mund të jetë i panevojshëm, ky është lajmi që këtë verë është sjellë edhe nga shumë media kombëtare italiane. Filli interdentar që këshillohet nga dentistët dhe rekomandohet nga qeveria federale amerikane që nga viti 1979, është një nga mjetet më klasike për higjienën orale, aq sa American Dental Association i dedikon në sitin e saj shumë hapësirë këtij mjeti dhe deklaron që pastrimi midis dhëmbëve i kryer me fill është një pjesë thelbësore e kujdesit të dhëmbëve dhe gingivave.

Por shumë ekspertë tashmë po bëjnë një hap pas duke ndezur një debat të fortë përtej oqeanit.
Fitili u ndez nga Associates Press (AP), agjencia e parë e shtypit ndërkombëtar dhe deri më tani më e rëndësishmja në gjuhën angleze.
AP ka ekzaminuar kërkimet më të sakta të publikuara në literaturë në dhjetë vjeçarin e fundit, duke u fokusuar në veçanti në 25 studime që ekzaminojnë rezultatet mbi shëndetin oral të arritura vetëm me furçë dhëmbësh, duke i krahasuar me përdorimin shtesë të fillit interdentar. Epo, provat e një përfitimi më të madh shfaqen "të dobëta dhe shumë të pabesueshme".

"Për pjesën më të madhe, studimet e disponueshme nuk arrijnë të tregojnë që filli interdentar është përgjithësisht efikas në heqjen e pllakës bakteriale", - kanë përfunduar autorët e një rishikimi shkencor të literaturës të kryer vjet, por duke lënë të hapur mundësinë e një dobishmërie të tij në trajtimin e gingivitit.
Edhe një tjetër rishikim i literaturës, i kryer nga Cochrane në 2011, ka sjellë një reduktim të lehtë të inflamacionit të gingivave, por janë të njëjtët studiues që i klasifikojnë si pak të besueshme provat e sjella.
Pra, duke parë cilësinë e dobët të studimeve të kryera është e mundur që të ekzistojnë përfitime, por në fakt deri tani nuk janë vëzhguar. Ka qenë e mjaftueshme të bindet qeveria federale e SH.B.A- së që të bëjë një hap pas. Në udhëzimet e tyre të fundit që lidhen me ushqyerjen, që kanë dalë këtë vit, rekomandimi mbi përdorimin e fillit interdentar është hequr, pa paralajmërim. Përveç kësaj, në një letër të adresuar Associated Press, qeveria ka pranuar që efikasiteti i fillit interdentar nuk është provuar kurrë.

Por American Dental Association (ADA) dhe American Academy of Periodontology (ACP), shoqatat kryesore shkencore amerikane, respektivisht në stomatologji dhe parodontologji, vazhdojnë të besojnë te filli interdentar, duke cituar edhe disa studime që do të mbështesnin pozicionin e tyre favorizues, duke treguar efikasitetin e këtij mjeti në ndalimin e grumbullimit të pllakës bakteriale, për të parandaluar në këtë mënyrë gingivitin dhe kariesin. Problemi është që bëhet fjalë për studime të kryera në pak persona, të ndjekura për kohë shumë të shkurtra dhe me metodologji jo të sakta.

Wayne Aldredge, president i ACP, ka njohur dobësinë e provave shkencore në mbështetje të fillit dentar, në një revistë, duke deklaruar se ndikimi real i fillit interdentar do të ishte më i qartë nëse kërkuesit do të fokusonin studimet e tyre në grupe me rrezik të lartë për patologjitë gingivale, si diabetikët dhe duhanpirësit. Gjithashtu ka pohuar se do të vazhdojë t'ia rekomandojë përdorimin e fillit pacientëve të tij.
Zëdhënësi i ADA, Mathew J. Messina, ka shprehur të njëjtin mendim, duke u ankuar edhe se në studimet e kryera pjesëmarrësit nuk janë udhëzuar siç duhet për të përdorur fillin dentar në mënyrë korrekte.
Konsulenti shkencor i British Dental Association, Damien Walmsley, bën pjesë në rradhët e skeptikëve dhe ka pohuar rëndësinë e promovimit të parimeve themelore të higjienës orale dhe të parandalimit, duke thënë se midis këtyre nuk bën pjesë përdorimi i fillit. Në mungesë të studimeve të reja që mund të japin përgjigje më bindëse, debati duket se do të vazhdojë.

Adelmo Calatroni

Referenca bibliografike:
(1) Sälzer S, Slot DE, Van der Weijden FA, Dörfer CE. Efficacy of inter-dental mechanical plaque control in managing gingivitis--a meta-review. J Clin Periodontol. 2015 Apr;42 Suppl 16:S92-105.
(2) Sambunjak D, Nickerson JW, Poklepovic T, Johnson TM, Imai P, Tugwell P, Worthington HV. Flossing for the management of periodontal diseases and dental caries in adults. Cochrane Database Syst Rev. 2011 Dec 7;(12):CD008829

Përktheu: Valbona Spahia