Bie miti i pijeve pa sheqer. Studimi australian evidenton që mund të shkaktojnë erozione dentare

Pijet pa sheqer të përdorura nga sportistët, por jo vetëm, për shkak të përmbajtjes së lartë të substancave acide janë përgjegjëse për erozionin dentar si dhe lezionet e pakthyeshme të smaltit të lokalizuara më së shumti në qafën e dhëmbit.

Ky është rezultati që del nga një studim i publikuar së fundmi nga Kërkuesit e Universitetit të Melburnit në Australi të udhëhequr nga Eric Reynolds, drejtor i Dental School në Melburn. Si konsumatorë, deklaron Reynolds në intervistën e tij në një portal të njohur dentar amerikan, jemi shqetësuar për vite me rradhë për efektet e dëmshme në shëndetin tonë të shkaktuara nga sheqernat e thjeshta që shtohen në ushqime dhe pije, që favorizojnë diabetin, obezitetin dhe kariesin. Industria, i ka orientuar konsumet tona drejt produkteve pa sheqer.
Sot tregu është plot me Pije me Vitamina, pije të buta me shënimin "dietike" apo "zero kalori", çajra të ftohta, ushqime të shpejta dhe çamçakëza pa sheqer, për shkak se lidhja midis sheqerit dhe kariesit është dokumentuar mirë gjatë viteve me anë të kërkimeve të shumta.

"Ende dimë pak mbi shkaqet e erozionit, humbjet e smaltit dentar të pakthyeshëm që tradicionalisht e kemi lidhur me acidet, bakteret dhe traumën okluzale", - vazhdon kërkuesi.
"Për këtë arsye kemi testuar potencialin eroziv të 15 pijeve që shiten në mensat e shkollave Australiane qoftë me sheqer qoftë pa sheqer, duke përfshirë edhe ujin mineral. Të gjitha pijet janë testuar në molarë humanë që janë hequr më parë dhe që nuk janë me karies."

Parametrat e monitoruara ishin dy:
1) humbja e smaltit të sipërfaqes e matur me skanime të përshtatshme;
2) zbutja e sipërfaqes e matur me testerin e Knoop.
Vlerat e gjetura për pijet janë shumë të larta në krahasim me ujin mineral që nuk shkakton ndryshime në smaltin e dhëmbëve. Kërkimi evidenton që nuk është e rëndësishme diferenca midis produkteve me ose pa sheqer pasi të dy rezultojnë të dëmshëm për smaltin e dhëmbit.
Surpriza ka qenë që pije të shumta paraqisnin një përmbajtje të lartë të acidit citrik dhe acidit fosforik të cilët veprojnë mbi smalt si gërryes të vërtetë nëse pija konsumohet për një kohë të gjatë.

Nën kujdesin e: Davis Cussotto, stomatolog, profesionist i lirë

Përktheu: Valbona Spahia