Prp me transplant kocke në ngritjen e sinusit. Nuk duket se përmirëson mbijetesën e implantit

Një rishikim sistematik i literaturës i kohëve të fundit, nën kujdesin e kërkuesve brazilianë, ka vlerësuar efektet mbi formimin e një kocke të re dhe për mbijetesën e implanteve të plazmës të pasuruar me trombocite (Prp) në kombinim me transplantin kockor në ngritjen e sinusit të nofullës. Rezultati konfirmon dyshimet e skeptikëve: transplanti bashkë me prp nuk ka asnjë influencë: nuk përmirëson mbijetesën e implanteve dhe as nuk prodhon formimin e indit kockor.

Një trajtim regjenerues me Prp është propozuar në bashkëpunim me transplantin kockor me shpresën se ky kombinim do të ndihmonte proceset natyrale të shërimit, falë një përmbajtjeje të lartë të faktorëve të rritjes së trombociteve të Prp. Rezultatet premtuese ishin shfaqur nga disa studime por në shumë të tjerë nuk ishin vënë re përfitime.

Për të qartësuar çështjen ishte e nevojshme të merreshin në konsideratë të gjithë kontributet shkencore dhe autorët kanë zgjeruar kërkimin në publikimet e kryera nga viti 2000 deri në 2015, që ka sjellë përfshirjen e të dhënave nga 17 studime, të dobishëm për të kryer analizat cilësore dhe të 13 studimeve për një analizë më të saktë sasiore; këto të fundit kanë marrë në shqyrtim në total 369 pacientë me moshë mesatare 50 vjeç për një vlerësim të 621 ndërhyrjeve të ngritjes së sinusit të nofullës. Më pas, analizës së parë të të dhënave i janë kryer të tjera analiza që nuk kanë treguar ndryshime domethënëse në Koeficientin e qëndrueshmërisë së implantit (Isq), në Humbjen e kockës margjinale (Mbl) në lartësinë e kockës alveolare, në mbijetesën e implantit apo në formimin kockor.
Përdorimi i Prp - komentojnë autorët - ka qenë i dobishëm për regjenerimin kockor në situata të tjera stomatologjike, megjithatë ky efekt pozitiv nuk është verifikuar kur përqendrimi i trombociteve përdoret në bashkëpunim me transplantin në ndërhyrjen e ngritjes së dyshemesë së sinusit të nofullës për qëllime implant-protezë. Përpos kësaj, Prp mund të përdoret për të bërë më të thjeshtë menaxhimin e transplanteve të grimcave për të përmirësuar qëndrueshmërinë e vetë transplantit pas ngritjes së sinusit dhe të reduktojë shqetësimet e pacientit nëpërmjet një shërimi më të shpejtë.

Adelmo Calatroni

Për më tepër: Lemos CA, Mello CC, Dos Santos DM, Verri FR, Goiato MC, Pellizzer EP.Effects of platelet-rich plasma in association with bone grafts in maxillary sinus augmentation: a systematic review and meta-analysis. Int J Oral Maxillofac Surg. 2016 Apr;45(4):517-25.

Përktheu: Erjola Taga