Përse t'i motivojmë pacientët për përdorimin e fillit dentar. Por jo të gjithë fillet janë njësoj

Lara Figini

Mënyra më e mirë për të parandaluar inflamacionet e gingivave, sëmundjet periodontale dhe kariesin është ndjekja në mënyrë të rregullt dhe të saktë e manovrave të higjienës orale që fillojnë nga furça e dhëmbëve. Megjithatë përdorimi i furçës duhet të jetë i integruar me përdorimin e pajisjeve të tjera të pastrimit, si filli dentar ose furçat që futen në mes të dhëmbëve për të hequr biofilmin dentar që grumbullohet në sipërfaqet ndërmjet dhëmbëve, duke qenë se te këto zona për arsye të qarta furça nuk mund të futet në mënyrë efikase. Për më tepër, është vënë re që në mënyrë tendencioze grumbullohen përqendrime të biofilmit dentar në sipërfaqet mes dhëmbëve në krahasim me pjesët proksimale.

Në zgjedhjen e pajisjes për pastrimin ndërmjet dhëmbëve më të përshtatshme për çdo pacient, duhet të merren në konsideratë përmasat dhe morfologjia e hapësirave ndërmjet dhëmbëve[Berchier 2008]. Duhen marrë në konsideratë edhe aftësia e çdo pacienti për të përdorur këto pajisje në mënyrën e duhur. Ja përse, nëse do flasim për parandalim, është shumë e rëndësishme roli i higjenistit dentar dhe i stomatologut në motivimin e pacientit për mbajtjen e higjienës orale në mënyrë të saktë dhe të rregullt duke i shpjeguar mirë me detaje çdo manovër që duhet të bëjë në shtëpi pacienti me kohët dhe mënyrat e duhura.

Sipas një studimi të Zimmer, vetëm një pjesë e vogël e popullsisë përdor fillin dentar çdo ditë dhe përdorimi i tij është më i madh tek individët me nivele socio-ekonomike të ngritura. Shumë persona shmangin përdorimin e fillit dentar, sepse e konsiderojnë të papërshtatshëm për shkak të kohës që kërkon, të vështirë për t'u përdorur dhe kanë frikë se mos copëtojnë papillën ndërmjet dhëmbëve [Laing 2008]. Krahas një kontrolli mekanik të biofilmit dentar të marrë me furçën e dhëmbëve, filli dentar mund të jetë edhe një kontroll kimik i biofilmit duke përdorur për shembull edhe shpëlarësit e gojës. Një nga agjentët më efikas antibakterial për zgavrën e gojës është klorheksidina. Veprimi i saj shpjegohet me dëmtimin e membranës citoplazmatike, duke sjellë lizën qelizore bakteriale [Herrera 2003]. Për më tepër klorheksidina ka një aftësi mbajtjeje duke qëndruar për një kohë të gjatë tek indet orale. Në një studim të fundit në maj 2015 të botuar tek International Journal of Dental Hygiene hetohet efikasiteti i përdorimit të fillit dentar i mbarsur me 5% klorheksidina glukonat në reduktimin e biofilmit dentar mbi gingiva.
Ky studim paralel, i kontrolluar dhe i rastësishëm ka marrë në konsideratë një kampion prej tridhjetë studentësh të stomatologjisë në Fakultetin e Farmacisë, Stomatologjisë dhe Infermierisë në Universitetin Shtetëror të Ceará, në Brazil, të ndarë në mënyrë të barabartë në tre grupe. Grupi i kontrollit negativ (NK) tek i cili nuk përdoret asnjë mjet për pastrimin ndërmjet dhëmbëve; grupi i kontrollit pozitiv (PK) në të cilin përdoret filli dentar i veshur me një shtresë të hollë dylli,dy herë në ditë, pa asnjë mbarsje, dhe grupi i testit (T) ku përdoret i njëjti fill dentar por i mbarsur me 5% klorheksidinë glukonat, dy herë në ditë. Kohëzgjatja e studimit ishte 15 ditë. Pas kësaj periudhe autorët analizuan praninë e biofilmit, duke e vlerësuar në katër sipërfaqe (mesiobukale, distobukale, mesiolinguale dhe distolinguale) me tregues Quigley-Hein, me katër pikë pasuese për çdo dhëmb. Rezultatet e marra janë si në vijim:
Tek grupi T (filli dentar i mbarsur me klorheksidinë) u gjetën nivelet më të ulëta të pllakës bakteriale, duke treguar një diferencë në mënyrë të konsiderueshme në krahasim me grupin NK (pa fill dentar) (p<0.001) dhe grupi PK (filli dentar pa klorheksidinë)(P<0,001). Edhe tek grupi PK (filli dentar pa klorheksidinë) u gjet një grumbullim më i vogël i pllakës bakteriale me diferencë të konsiderueshme në krahasim me grupin e kontrollit (p<0.001) ku nuk u përdor filli dentar.

Përdorimi i fillit dentar të mbarsur me klorheksidinë glukonat me 5% provokon reduktime të tjera të biofilmit mbi gingiva në krahasim me rezultatet e arritura me përdorimin e vetëm konvencional të fillit dentar të veshur me një shtresë të hollë dylli në një popullsi të motivuar mirë dhe të shkolluar.

Nën kujdesin e : Lara Figini, Koordinatore Shkencore e Odontoiatria33

Bibliografia:
- Berchier CE, Slot DE, Haps S, Van der Weijden GA. The efficacy of dental floss in addition to a toothbrush on plaque and parameters of gingival inflammation: a systematic review. Int J Dent Hyg 2008; 6: 265-279.
- Zimmer S, Kolbe C, Kaiser G, Krage T, Ommerborn M, Barthel C. Clinical efficacy of flossing versus use of antimicrobial rinses. J Periodontol 2006; 77: 1380-1385.
- Laing E, Ashley P, Gill D, Naini F. An update on oral hygiene products and techniques. Dent Update 2008; 35:270-272, 275-276, 278-279.
- Herrera D, Roldan S, Santacruz I, Santos S, Masdevall M, Sanz M. Differences in antimicrobial activity of four commercial 0.12% chlorhexidine mouthrinse formulations: an in vitro contact test and salivary bacterial counts study. J Clin Periodontol 2003; 30: 307-314.
- FWMG Muniz, KS Sena, CC de Oliveira, DM Veríssimo, RS Carvalho e RS Martins . Efficacy of dental floss impregnated with chlorhexidine on reduction of supragingival biofilm: a randomized controlled trial ; Internationa Journal of Dental Hygiene maggio 2015, vol. 13 Issue 2; pag. 117-124

Përktheu: Valbona Spahia