Lidhja midis lichen planus oral dhe patologjive të tiroides

Lara Figini

Lichen planus është një sëmundje inflamatore kronike muko - lëkurore me origjinë imunitare që prek rreth 1% të popullsisë së përgjithshme.
Përhapja e shfaqjeve orale varion nga 0,1 deri në 2,2%.
Patogjeneza e lichen planus lidhet ngushtë me një imuno-rregullim të ndryshuar nëpërmjet limfociteve T citotoksike që përcakton një dëm të keratinociteve epiteliale. Këto qeliza, për arsye ende të paqarta, modifikohen nga antigjenet e membranës që shkakton një përgjigje citotoksike nga ana e limfociteve T. Supozohet që në modifikimin e antigjeneve të qelizave epiteliale kanë një rol përcaktues substancat kimike, stresi, alogjenet, traumat, materialet dentare, barnat ose agjentët biologjikë si virusi i hepatitit C.

Në vitet e fundit, një numër në rritje i punimeve shkencore ka sugjeruar një lidhje midis sëmundjeve të tiroides dhe Lichen Planus Oral (OLP).
Në një studim të publikuar në Oral Surg Oral Med Oral Pathol Oral Radiol në nëntor 2015 studiohet përhapja dhe profili i sëmundjeve të tiroides në një grup pacientësh të prekur nga lichen planus oral (OLP) në krahasim me një kampion popullsie të zakonshme që nuk është e prekur nga kjo patologji dhe ekzaminohen karakteristikat klinike të pacientëve të prekur nga OLP me dhe pa sëmundje të tiroides.

Studimi përfshin 2 grupe: Grupi 1 konsiston në një total prej 1611 pacientë (mosha mesatare 57 vjeç; intervali 15 - 93 vjeç; nr. i grave = 1041) të diagnostikuar me OLP, nga këto, 170 pacientë merrnin levotiroksinë në momentin e ekzaminimit primar. Nga ky grup janë krijuar 2 nëngrupe:
-Nëngrupi A: pacientët me OLP bashkë me sëmundje të tiroides në trajtim me barna me bazë levotiroksine (OLP/levotiroksinë + ).
-Nëngrupi B: grupi i pacientëve me OLP pa ndonjë sëmundje të tiroides të njohur ose jo në terapi me barna me bazë levotiroksine (OLP/levotiroksinë - ).

Grupi 2 ose grupi i kontrollit përbëhet nga pacientë që nuk janë prekur nga OPL - ja.
Diagnoza e OLP - së është kryer nga specialistë në patologjitë orale duke ndjekur kriteret klinike dhe histopatologjike të vendosura nga Organizata Botërore e Shëndetit (OBSH).
Pacientët që kanë paraqitur lloje të tjera lezionesh të mukozës orale, me reaksione të përfshira nga kontakti likenoid të vëzhguara në pjesën anësore të gjuhës ose në mukozën e gojës që është në kontakt me mbushjet me amalgamë, janë përjashtuar nga studimi. Pacientët me OLP që kanë edhe sëmundje të tiroides (OLP/levotiroksinë +) janë krahasuar sipas moshës dhe gjinisë me pacientët me OLP pa ndonjë sëmundje të tiroides të njohur ose jo që do të merrnin barna si levotiroksina (OLP/levotiroksina -).

Nga rezultatet e marra në këtë studim vihet re që përhapja e sëmundjes së tiroides te pacientët me OLP është në mënyrë të konsiderueshme më e lartë në krahasim me atë që është zbuluar në popullsinë e përgjithshme. Lezionet OLP të pacientëve që janë të sëmurë edhe me tiroide kanë një paraqitje të ndryshme me kalimin e kohës.
Pothuajse 11% (n=170) e pacientëve me OLP merrnin levotiroksinë në krahasim me 2,5% (n=40) në rastet e kontrollit. Nuk është zbuluar asnjë diferencë në profilin e sëmundjes së tiroides midis grupeve. Në momentin e riekzaminimit pas disa kohësh, pacientët me OLP/levotiroksinë- shfaqnin lezione OLP më shumë eritematoze dhe ankoheshin për simptoma më të rënda në krahasim me grupin OLP/levotiroksinë + të krahasuara në momentin primar (P<.001).

Nën kujdesin e: Lara Figini, Koordinatore Shkencore e Odontoiatria33

Bibliografia:
Clinical characteristics of patients with concomitant oral lichen planus and thyroid disease Jairo Robledo-Sierra, Kerstin Landin-Wilhelmsen, Helena Filipsson Nyström, Ulf Mattsson, e Mats Jontell, Oral Surg Oral Med Oral Pathol Oral Radiol nov 2015;120:602-608)

Përktheu: Valbona Spahia