Shëndeti oral dhe aktiviteti sportiv

Sipas Kolegjit Profesional të Fizioterapistëve të Komunitetit të Madrid infeksionet orale kufizojnë rendimentin fizik të sportistëve

Sipas Kolegjit Profesional të Fizioterapistëve të Komunitetit të Madrid infeksionet orale kufizojnë rendimentin fizik të sportistëve, qoftë profesionist qoftë amator dhe mund të shkaktojnë lezione muskulore ose të gjymtyrëve.
Sportistët janë më së shumti të ekspozuar ndaj problemeve orale sepse përbërja kimike e pështymës ndryshon në momentin që realizohet një aktivitet fizik duke rritur përbërjen alkaline të saj dhe duke favorizuar krijimin e gurëzave.
Infeksionet orale ndikojnë në mënyrë negative te rendimenti fizik i një atleti. Doktor Gustavo Camañas shpjegon se "goja në gjendje të keqe dëmton formën tonë fizike dhe mund të jetë shkak, përveç të tjerash, për probleme të ekuilibrit, të lezioneve të muskujve, të dhimbjeve të kokës dhe të dhimbjeve të barkut."
"Prania e baktereve është simptomë e një infeksioni oral dhe mund të lidhet me diabetin, me probleme respiratore, probleme të muskujve, të gjymtyrëve dhe kardiovaskulare."
Ndërsa doktor José Santos informon se "shumë lezione të gjymtyrëve dhe të muskujve shkaktohen nga prania e infeksioneve të elementëve dentar, ose të indit përreth dhëmbëve." Specialisti shpjegon se bakteret e pranishme në gojë përhapen në trup nëpërmjet enëve të gjakut dhe depozitohen te muskujt dhe te gjymtyrët duke prodhuar ndjesinë e lodhjes.
"Si pasojë ngadalësohen kontraktimet e muskujve dhe muskuli humbet fibra duke prodhuar ndjesinë e lodhjes dhe inflamacionit të gjymtyrës. Prandaj janë më të ekspozuar ndaj lezioneve që janë edhe më të zakonshme ndërmjet atij që realizon një aktivitet vërtet intensiv."
Camañas siguron se një pacient viktimë e një infeksioni oral do të ketë nevojë për më shumë kohë për t'u shëruar pas lezionit. Nga ana tjetër doktori pohon se sportistët janë më të ekspozuar ndaj rrezikut të sëmundjeve orale sepse "përbërja kimike e pështymës ndryshon në momentin që realizohet aktiviteti fizik duke u bërë më alkaline dhe duke favorizuar formimin e gurëzave.
Personat që kryejnë aktivitet fizik të rregullt janë më të ekspozuar ndaj kariesit dhe konsumimit të elementëve dentar për shkak të dehidratimit të mundshëm dhe të konsumimit me shumicë të produkteve të pasura me glukozë ose me pH të ulët. Gjatë praktikës së disa sporteve si noti dhe vaterpolo sportistët janë vazhdimisht në kontakt me klorin që është një substancë agresive për smaltin e dhëmbëve dhe mund të bëjë që dhëmbët të zverdhen. "

Camañas konfirmon se problemi oral më i përhapur te sportistët është traumatizmi i dhëmbëve. "Mbi 5 milionë elementë dentar janë shkatërruar çdo vit për shkak të traumave dhe traumatizmi sportiv ka qenë origjina e 39% të rasteve." Përveç kësaj gjatë aktivitetit sportiv me rrezik të ulët si futbolli, hendbolli dhe basketbolli mundësia për të patur një traumë është më e lartë sepse në krahasim me boksin ose ragbinë nuk përdoren maska mbrojtëse për dhëmbët.

Përktheu: Valbona Spahia