Studimi i botuar në revistën "Oral Oncology", u fokusua te produktet e përdorura për zgavrën orale me përmbajtje alkoolike dhe pasojat nga polimorfizmat e gjeneve që rregullojnë metabolizmin e alkoolit, të cilat njihen për lidhjen që kanë me tumoret e traktit aerodigjestiv të sipërm.

Studimi analizoi të dhënat e 1.963 pacientëve me kancer të zgavrës orale, orofaringut, hipofaringut, laringut apo ezofagut, nëpërmjet intervistave me pacientët mbi zakonet e higjienës orale dhe zakoneve të tjera (duhanpirja, konsumi i alkoolit, dieta, lloji i punës, problemet mjekësore, statusi socio-ekonomik), dhe nëpërmjet analizave gjenetike të kampioneve të gjakut.

Në përgjithësi, rreziku onkologjik rezultoi thuajse i dyfishtë te pacientët me shëndet të dobët oral dhe kujdes të limituar të dhëmbëve, ndërsa u trefishua te pacientët që përdornin gargarë tri herë në ditë, ndoshta për shkak të përmbajtjes së alkoolit në shumë nga këto përgatitje. Megjithatë ka nevojë për konfirmime të mëtejshme.

Kërkimi vë në dukje një aspekt prej kohësh të vlerësuar nga komuniteti shkencor, thotë prof. Giovanni Lodi, drejtor shkencor i revistës Dental Cadmos. "Sigurisht përdorimi i një produkti alkoolik disa herë në ditë (qoftë kjo një gargarë apo superalkoolik) mund të jetë një faktor risku për kancer oral, por i vështirë për të konfirmuar shkencërisht shkaqet e drejtpërdrejta dhe specifike të një gargare me bazë alkoolike", pohon studiuesi.

"Problemi specifik me gargarat qëndron te fakti se është shumë më e vështirë në krahasim me sjellje të tjera (duhanpirja dhe pije alkoolike) që të mblidhen të dhëna të qëndrueshme. Për shembull, nuk është e lehtë të rindërtohen se cilat produkte ka përdorur një subjekt gjatë 5 viteve të fundit dhe sa nga këto përmbanin alkool. Po ashtu numrat janë të vegjël. Në këtë kërkim ku kanë marrë pjesë 2000 subjekte me kancer, përfundimet mbi gargarat bazohen në 36 raste dhe 16 kontrolle. Me një fjalë shumë pak".

Por, për prof. Lodin duhet të bëhet një përshkrim i mëtejshëm që të flitet për faktorë risku dhe jo faktorë të rastësishëm: "Kjo është e rëndësishme, sidomos kur bëhet fjalë për higjienën orale dhe përdorimin e protezave, që pavarësisht se autorët kanë ndërfutur teknika statistikore të përshtatshme për këtë qëllim, të ashtuquajturit faktorë ngatërrestarë mund të fshehin lidhje me sëmundjen", përfundon Lodi.