BE ndalon përfundimisht përdorimin e amalgamës dentare, duke filluar nga 2025

Këshilli i Bashkimit Evropian miratoi përfundimisht Rregulloren që ndalon përdorimin e amalgamës, prodhimin, importimin dhe eksportimin e produkteve të tjera me përmbajtje...

Këshilli i Bashkimit Evropian miratoi përfundimisht Rregulloren që ndalon përdorimin e amalgamës, prodhimin, importimin dhe eksportimin e produkteve të tjera me përmbajtje merkuri. Standardet e përditësuara synojnë të adresojnë përdorimet e mbetura të merkurit në Bashkimin Evropian, në përputhje me objektivin e BE-së për ndotjen zero.

Në Itali, përdorimi i amalgamës është ndaluar që në vitin 2001 për trajtimet e fëmijëve nën 15 vjeç dhe të grave shtatzëna apo me gjidhënie. Më pas, me Dekretin Ndërministror të 11 nëntorit 2020, Italia zbatoi Planin Kombëtar për eliminimin e përdorimit të amalgamës dentare. Ky plan synon eliminimin e plotë të përdorimit të amalgamës në fushën stomatologjike përmes masave shtrënguese brenda 31 dhjetorit 2024.

Rregullat e reja, tashmë të miratuara përfundimisht, e shtrijnë këtë ndalim, duke filluar nga 1 janari 2025, për të gjithë pacientët në BE. Përjashtimet zbatohen kur dentisti e konsideron përdorimin e amalgamës dentare rreptësisht të nevojshme për të plotësuar nevojat specifike mjekësore të pacientit. Ky miratim parashikon edhe ndalimin e prodhimit dhe eksportit të amalgamës nga 1 janari 2025. Ndalimi i prodhimit dhe importit në BE do të zbatohet nga 1 korriku 2026.

Rregullorja do të hyjë në fuqi në të gjitha vendet anëtare të BE-së, njëzetë ditë pas publikimit në Fletoren Zyrtare evropiane. Në përputhje me rregullat e përditësuara, Komisioni do të shqyrtojë edhe përjashtimet në lidhje me përdorimin e amalgamës dentare deri më 31 dhjetor 2029, duke marrë parasysh ekzistencën e alternativave pa merkur.