Qasja ndaj pacientit me probleme konjitive

Në pjesën më të madhe të rasteve, vizita te dentisti, shkakton ankth dhe frikë. Këto ndjesi mund të shumëfishohen te individët që shfaqin dobësi...

Në pjesën më të madhe të rasteve, vizita te dentisti, shkakton ankth dhe frikë. Këto ndjesi mund të shumëfishohen te individët që shfaqin dobësi psikike, në lëvizje, etj.

Për këta individë, është thelbësore të krijohet një ambient sa më i rehatshëm, që në takimin e parë. Është shumë e rëndësishme që të fitohet besimi dhe siguria e pacientëve që në këtë fazë, pasi mund të jetë e dobishme për vazhdimësinë e trajtimit. Përballja me një ambient miqësor, shpesh rrit disponueshmërinë për pranimin e çfarëdolloj praktike terapeutike.

Dihet që ambientet shëndetësore lidhen, në përgjithësi, me momente dhimbjeje dhe shqetësimi. Prandaj, krijimi i ambienteve që të bëjnë t'i harrosh këto ndjesi, mund ta lehtësojë qasjen. Hapësirat e lyera me ngjyra të buta pastel, zakonisht sjellin qetësi, ngjitja e posterave në mur që shfaqin personazhe të trilluara, si dhe muzika e videot me volum të ulët, mund të krijojnë momente shpërqendrimi.

Në pjesën më të madhe të rasteve, takimi i parë rezulton thelbësor dhe nuk duhet të caktohet kohëzgjatje. Zakonisht, kjo është faza që përcakton shkallën e bashkëpunimit të individit me paaftësi.

Mbetet e rëndësishme që edhe familjarët, apo kujdestarët të bëjnë pjesën e tyre, duke u informuar dhe nxitur që të jenë më të durueshëm dhe më bashkëpunues me të dashurit e tyre që i nënshtrohen trajtimit stomatologjik, pasi shpeshherë, pritshmëritë e tyre kushtëzohen nga gjendjet e stresit për shkak të menaxhimit të individit me paaftësi.

Sapo të fitohet besimi, bashkëpunimi i pacientit do të kalojë në fazën tjetër, e cila është prezantimi dhe njohja me instrumentet e përdorura për kryerjen e terapive të nevojshme.

Prandaj, duhet të tregoheni të sjellshëm e të dashur dhe të jeni të vetëdijshëm mbi instrumentet që do të përdoren për realizimin e trajtimeve stomatologjike.

Si përfundim, mund të themi se qasja ndaj pacientit me brishtësi shëndetësore mund të skematizohet në pikat e mëposhtme:
• Formimi i një grupi specialistësh;
• Krijimi i një ambienti të rehatshëm dhe qetësues;
• Vlerësimi i shkallës së bashkëpunimit gjatë takimit të parë;
• Informimi i familjarëve, apo kujdestarëve;
• Komunikimi i trajtimit stomatologjik për pacientin, apo kujdestarin, në mënyrën e duhur dhe me efikasitet.