Reaksionet e mbindjeshmërisë ndaj pastave të dhëmbëve. Identifikimi dhe trajtimi i rasteve

Në stomatologji, reaksionet më të zakonshme të mbindjeshmërisë janë ato të llojit I dhe IV. Reaksionet e llojit I janë të menjëhershme dhe rrjedhin nga imunoglobulina...

Reaksionet e mbindjeshmërisë janë një përgjigje imunitare sekondare që verifikohet te një pacient në gjendje parandjeshmërie (imune).

Në stomatologji, reaksionet më të zakonshme të mbindjeshmërisë janë ato të llojit I dhe IV. Reaksionet e llojit I janë të menjëhershme dhe rrjedhin nga imunoglobulina E (IgE), ndërsa ato të llojit IV janë të mëvonshme dhe rrjedhin nga limfocitet T. Kjo e fundit është më e shpeshta dhe përcaktohet zakonisht si "stomatiti i kontaktit".

Pastat e dhëmbëve përdoren çdo ditë nga pjesa më e madhe e popullsisë në botë dhe zakonisht kanë përbërje komplekse që përmbajnë deri në 20 përbërës. Këta përbërës nuk janë të gjithë terapeutikë, por përmbajnë edhe agjentë për të përmirësuar shijen, aromën dhe qëndrueshmërinë e pastës.

Lezionet e mukozës orale, që lidhen shpesh me pastat e dhëmbëve, janë kryesisht sekondare ndaj reaksioneve të irritimit dhe mbindjeshmërisë. Aromat dhe konservuesit e pastave janë përcaktuar si përbërës të lidhur ndjeshëm me "stomatitin e kontaktit".

Në një studim të publikuar në Journal of the American Dental Association, autorët paraqitën rastet e tyre klinike të grumbulluara gjatë 10 viteve të fundit dhe kryen një rishikim të studimeve të publikuara në literaturë përsa u përket përgjigjeve të mbindjeshmërisë ose alergjisë gingivare nga pastat e dhëmbëve.

U grumbulluan 11 raste: tetë reaksione të mbindjeshmërisë gingivare u verifikuan te gratë dhe lidheshin me kanellën. Lezionet që u diagnostikuan më shpesh ishin ato të gingivave të skuqura. Ndërprerja e përdorimit të pastës shkaktoi zhdukje të lezioneve.

Nga të dhënat e këtij studimi, i cili duhet të konfirmohet në studime të tjera të ngjashme, mund të themi se përgjigjet e mbindjeshmërisë gingivare për shkak të pastës së dhëmbëve janë të rralla.

Këto reaksione janë më të zakonshme te gratë sesa te meshkujt dhe mund të shfaqen në çdo moshë. Agjentët e përfshirë më shumë në këto reaksione mbindjeshmërie ndaj pastave të dhëmbëve janë aroma të caktuara, si kanella dhe parfumet.

Ndërlikimet klinike
Ky studim jep të dhëna për diagnostikimin dhe trajtimin e reaksioneve të mbindjeshmërisë ndaj pastave të dhëmbëve, që mund të përmirësojnë identifikimin, trajtimin dhe referimin e këtyre rasteve.

Nga të dhënat e studimit, rezultoi se pjesa më e madhe e lezioneve shkaktoheshin nga skuqja e gingivave, e cila nuk iu përgjigjet trajtimeve periodontale.

Këto lezione gingivare është e vështirë të diagnostikohen. Gjatë diagnostikimit është e rëndësishme të njihet historia e plotë klinike përsa u përket produkteve të higjienës orale që përdor pacienti. Në disa raste, edhe testet patch dhe biopsia mund të jenë të dobishme për diagnostikimin diferencial. Ndërprerja e përdorimit të pastës mund të shkaktojë zhdukje të lezioneve.

Është e nevojshme që kompanitë prodhuese të sinjalizohen në lidhje me këto reaksione të mbindjeshmërisë gingivare ndaj përbërësve të pastës së dhëmbëve, sepse identifikimi dhe zëvendësimi i tyre mund të ndihmojë në parandalimin e kësaj patologjie.