Reduktimi i ankthit në stomatologji. Efikasiteti i terapisë muzikore

Ankthi është një problematikë kryesore në klinika dentare, që mund të prekë 10-20% të të rriturve dhe gati 43% të fëmijëve dhe adoleshentëve. Sjellja neglizhente e këtyre pacientëve ndaj shëndetit të tyre...

Ankthi është një problematikë kryesore në klinika dentare, që mund të prekë 10-20% të të rriturve dhe gati 43% të fëmijëve dhe adoleshentëve. Sjellja neglizhente e këtyre pacientëve ndaj shëndetit të tyre oral është pasojë e pashmangshme e ankthit dhe e frikës nga trajtimet dentare, e cila shfaqet me shmangien e këtyre të fundit.

Shpesh detyrohemi të përdorim mënyrën e "qetësimit të vetëdijshëm" dhe administrimin e barnave anksiolitike te pacientët me nivele të larta ankthi. Megjithatë, shumë pacientë të rritur, por veçanërisht prindër të pacientëve pediatrikë që vuajnë nga "ankthi dentar", preferojnë t'i shmangin trajtimet farmakologjike për shkak të rreziqeve mjekësore që lidhen me to. Për më tepër, nuk duhet të anashkalohet rritja e konsiderueshme e kostove të trajtimeve dentare, kur duhet ndjekur mënyra e "qetësimit të vetëdijshëm". Për këto arsye, teknikat e menaxhimit të sjelljes përdoren gjithnjë e më shumë në këto raste dhe dëgjimi i muzikës për menaxhimin e ankthit është një ndërhyrje alternative, e pranuar gjerësisht nga prindërit, pacientët pediatrikë e të rritur dhe nga profesionistët.

Faktorët individualë që ndikojnë në përgjigjet e pacientëve ndaj muzikës janë:
- mosha dhe gjinia;
- funksioni konjitiv dhe kultura;
- shkalla e ankthit;
- preferencat muzikore;
- marrëdhëniet personale me muzikën;

Autorët e një studimi kanë publikuar një sërë udhëzimesh që mund të jenë të dobishme për stomatologun:
1. Lëreni pacientin të dëgjojë muzikën e tij të preferuar gjatë trajtimeve. Kjo ngre humorin dhe është në gjendje ta mbajë individin të vëmendshëm;
2. Lëreni pacientin të dëgjojë gjatë trajtimeve muzikën e tij të preferuar relaksuese;
3. Lëreni pacientin të menaxhojë volumin, për të parandaluar shqetësime dhe për të maksimizuar kontrollin e perceptuar;
4. Lëreni pacientin të zgjedhë nëse do të përdorë kufje apo do ta dëgjojë muzikën në sfond. Ndërsa kufjet mund të ndihmojnë në maskimin e "tingujve dentarë", ato mund të rrisin ankthin te pacientët duke penguar komunikimin me dentistin. Kur përdoren kufje, volumi i muzikës duhet të mbahet i ulët për të lejuar komunikimin me dentistin, por në të njëjtën kohë duhet të sigurojë maskimin e duhur të "tingujve dentarë";
5. Koha e ndërhyrjes muzikore. Është e rëndësishme që dëgjimi i muzikës të fillojë përpara trajtimit dentar, sa herë që është e mundur. Kjo mund të ndihmojë në parandalimin e ankthit ndërsa pacienti është në dhomën e pritjes;
6. Pacientët duhet të inkurajohen të përqendrohen në mënyrë aktive në muzikën që po dëgjojnë, në vend që thjesht ta dëgjojnë atë.

Përfundimet
Nga ky studim mund të thuhet se dëgjimi i muzikës mund të ndihmojë në uljen e ankthit lidhur me procedurat mjekësore/dentare dhe në këtë mënyrë, e bën trajtimin më të menaxhueshëm.
Për të optimizuar ndikimin e trajtimit, ndërhyrjet muzikore duhet të fillojnë që në dhomën e pritjes.
Efikasiteti i terapisë muzikore nuk është shumë i lartë te pacientët me shkallë të lartë ankthi. Autorët rekomandojnë që të konsultoheni me një muziko-terapist, përsa iu përket këtyre individëve.

Ndërlikimet klinike
Një metodë e thjeshtë, jo e shtrenjtë dhe e realizueshme në çdo kontekst stomatologjik për reduktimin e ankthit të pacientëve është terapia me muzikë. Shumica e studimeve aktuale në këtë drejtim janë fokusuar në shpërqendrimin pasiv të pacientëve me ankth nëpërmjet muzikës.