Mikrobioma orale dhe migrena. Lidhja befasuese që ekziston ndërmjet tyre

Një studim i koordinuar nga Antonio Gonzales nga Universiteti i Kalifornisë në San Diego, ka treguar për herë të parë se ekziston nje lidhje e mundshme midis baktereve të pranishme në kavitetin oral dhe migrenës. Autori tregon se është thelluar në këtë çështje pasi ka vënë re se gruaja e tij kishte dhimbje koke sa herë që hante hamburger ose sallame, ushqime të pasura me nitrate.

Asgjë e re deri këtu, sepse është vëzhguar edhe më herët se përbërjet që kanë në përmbajtje nitrate mund të shkaktojnë dhimbje koke. Shpesh të përdorur si aditivë te mishrat e përpunuar, nitratet janë të pranishme edhe në disa zarzavate si dhe në disa lloje barnash që janë për sëmundjet kardiovaskulare dhe në fakt, rreth 10% e pacientëve nuk i tolerojnë këto terapi vetëm për shkak të intensitetit të dhimbjes së kokës që i shoqëron.

Dhimbja e kokës që vjen si pasojë e nitrateve manifestohet tipikisht me dy mënyra të ndryshme, ose shkaktohen menjëherë me intensitet të lehtë apo të moderuar, ose pas disa orësh dhe është shumë më e fortë: në këtë rast, intensiteti i simptomave varet nga doza dhe janë më të ekspozuar individët që kanë një histori individuale ose familjare migrenë. Literatura sugjeron që dhimbjet e menjëhershme të kokës dhe ato të vonuara shkaktohen nga dy mekanizma të ndryshëm, por të dy lidhen me praninë e oksidit nitrik, që për më tepër është një molekulë strategjike për sistemet antioksiduese të organizmit.

Rëndësia e studimit të Gonzales qëndron në zbulimin e rolit të baktereve orale: disa nga këto janë në gjendje të konvertojnë nitratet në nitrite, këto të fundit prodhojnë oksidin nitrik me një efekt vazodilatacioni që, tek individët e predispozuar përkthehet në dhimbje koke.

Kërkuesit kalifornianë kanë analizuar mikrobiomën intestinale dhe atë orale të pacientëve që pas marrjes së nitrateve kishin zhvilluar migrenë, duke i krahasuar me atë të pjesëmarrësve që nuk e kishin këtë simptomë.

Krahasimi i kampioneve fekale nuk ka evidentuar diferenca të veçanta në përbërjen e mikrobiomave, ndërsa te kampionet orale të individëve me migrenë ishin më të pranishëm gjene që kodifikojnë nitratet, nitritet dhe enzimat që favorizojnë reduktimin e oksidit nitrik. Rezultati është në linjë me pohimin e dy paradigmave që janë bërë gjithnjë e më evidente nga kërkimet: rëndësia e mikrobiomës dhe lidhja e kushteve të zgavrës orale me ato sistemike.

Për më shumë informacion:
Migraines Are Correlated with Higher Levels of Nitrate-, Nitrite-, and Nitric Oxide-Reducing Oral Microbes in the American Gut Project Cohort