Periodontiti shton rrezikun për zhvillimin e kancerit të stomakut

Njerëzit që vuajnë nga sëmundjet periodontale janë më të rrezikuar për të zhvilluar kancer të stomakut dhe ezofagut, sipas një studimi të botuar në "Gut".

"Studimet e mëparshme mbi marrëdhëniet midis sëmundjeve periodontale, humbjes së dhëmbëve dhe kancerit të ezofagut dhe atij të stomakut, nuk kanë qenë konsistente. Kjo është arsyeja pse kemi dashur ta hetojmë çështjen më tej", shpjegon Chun-Han Lo (Shkolla e Shëndetit Publik Harvard T.H. Chan, në Boston), autori kryesor i studimit.

Studiuesit analizuan lidhjen midis periodontitit dhe humbjes së dhëmbëve, me rrezikun për kancer të ezofagut dhe stomakut te 98.459 gra që morën pjesë në Studimin e Shëndetit të Infermierëve dhe 49.685 burra që morën pjesë në Studimin e Profesionistëve të Shëndetit.

Problemet dentare, demografia, mënyra e jetesës dhe dieta u vlerësuan duke përdorur pyetësorë ndjekjeje dhe diagnoza e vetëraportuar e kancerit u konfirmua përmes të dhënave mjekësore.

Gjatë 22-28 viteve ndjekje u regjistruan 199 raste të karcinomës së ezofagut dhe 238 raste të karcinomës së stomakut. Historiku i sëmundjes periodontale u shoqërua me një rrezik të shtuar prej 43% për karcinomë të ezofagut dhe 52% për kancer të stomakut. Në krahasim me njerëzit pa humbje dhëmbësh, rreziqet e kancerit të ezofagut dhe stomakut për ata që kishin humbur dy ose më shumë dhëmbë ishin përkatësisht 42% dhe 33%. Për më tepër, mes individëve me historik të sëmundjes periodontale, njerëzit pa humbje dhëmbësh dhe ata me një ose më shumë humbje dhëmbësh kishin 59% më shumë rrezik për kancer të ezofagut, në krahasim me individët që nuk kishin histori të sëmundjes periodontale dhe të humbjes së dhëmbëve. Në të njëjtin grup individësh, u regjistruan respektivisht 50% dhe 68% rritje të rrezikut për kancer të stomakut.

Autorët sugjerojnë se në këtë lidhje mund të implikohen bakteret orale dhe se provat nga studime të tjera sugjerojnë që Tannerella forsythia dhe Porphyromonas gingivalis, patogjene të njohura që shkaktojnë periodontit, janë të lidhura me praninë ose rrezikun e kancerit të ezofagut. Një arsye tjetër e mundshme është se higjiena e dobët e orale dhe sëmundja periodontale mund të favorizojnë formimin e nitrosaminave endogjene, tashmë të njohura si shkaku i kancerit.

"Do të duhen studime të mëtejshme perspektive që vlerësojnë direkt mikrobiomën orale, për të identifikuar bakteret specifike orale përgjegjëse për këtë lidhje", përfundojnë autorët.