Fluoroza. Ja, si mund të trajtohet

Fluoroza është një gjendje kronike e shkaktuar nga gëlltitja e tepërt e fluorit. Kjo përcakton një formim të ndryshuar të smaltit, të karakterizuar nga hipomineralizimi, me njolla opake dhe vija të bardha, simetrike, të çngjyrosura dhe të përhapura.

Lezionet sipërfaqësore të smaltit, si poroziteti dhe zonat kafe, verifikohen shpesh në format më të rënda të fluorozës. Këto shenja klinike varen nga sasia e përthithur e fluorit, nga kohëzgjatja e ekspozimit ndaj fluorit dhe nga gjendja e amelogenesis.

Një studim i publikuar së fundi në "Journal of Esthetic and Restorative Dentistry", ka bërë krahasimin ndërmjet trajtimeve të ndryshme për fluorozën, duke u përpjekur të japë një përgjigje mbi zgjedhjen që duhet bërë, sipas secilit rast.

Ndërhyrjet e propozuara për trajtimin e fluorozës:

• infiltrimi i smaltit me rezinë fotopolimerike me viskozitet të ulët, për të fshehur njollat e fluorit, sepse kompozitat kanë një indeks të përthyerjes të ngjashme me smaltin.
• mikroabrazioni, i bazuar në aplikimin e një xheli gërryes (kryesisht me HCl) i ndjekur nga përdorimi i një guri (të montuar në një dorezë me rrotullim të ngadaltë) për të ashpërsuar sipërfaqen;
• zbardhimi i jashtëm, i bazuar në aplikimin e acideve (kryesisht H2O2) që prodhojnë jone peroksidi për të penetruar në smalt dhe në tubulat dentinale;

Por, cila nga këto konsiderohet si më efektivja?

Autorët kanë kryer kërkimin mbi nëntë baza të dhënash, duke përzgjedhur studime klinike me përzgjedhje rastësore që nga viti 2016. Kështu, në shqyrtim janë përfshirë gjashtë studime, me një numër të përgjithshëm prej 348 pacientësh (40% meshkuj dhe 60% femra), me moshë mesatare prej 17,7 vjeç.
Pacientët janë ndarë në tre grupe dhe janë trajtuar me zbardhim, mikroabrazion ose infiltrim të rezinës. Të gjithë grupet janë krahasuar duke llogaritur: diferencat mesatare (MD), risqet relative (RR) dhe intervalet korresponduese të besueshmërisë në 95% (IC).

Rezultatet

Zbardhimi është përshtatur si ndërhyrje referimi, sepse ka kontribuuar me numrin më të madh të provave. Në krahasim me personat që nuk kanë marrë asnjë trajtim, zbardhimi ka përmirësuar të gjithë aspektet kolorimetrike, edhe pse një numër i vogël i zonave të fluorozës që janë zbardhur kishin prirje për të pasur diferenca kromatike të dallueshme nga smalti i shëndetshëm (RR = 0,68; IC 95% = 0,43 - 1,08).
Në krahasimin ndërmjet mikroabrazionit dhe zbardhimit, mikroabrazioni ka prodhuar një përmirësim estetik më të vogël në krahasim me zbardhimin (MD: -2,9; IC 95%: -3,4-2,5). Në krahasim me infiltrimet me kompozitat dhe zbardhimin, kompozitat kishin pasur një përmirësim estetik më të madh në krahasim me zbardhimin (MD: 3,6; IC95%: 2,7-4,6).

Në bazë të evidencave aktuale, infiltrimet me kompozita duket se janë trajtimi më efikas për fluorozën e dhëmbëve, të ndjekura nga zbardhimi dhe mikroabrazioni.