Higjiena orale dhe roli i aftësive manuale

Nga Lara Figini

Kariesi dentar dhe sëmundja periodontale janë ndër sëmundjet të cilat sjellin më shumë pasoja në kavitetin oral dhe më të përhapura në mbarë botën. Biofilmi dentar (pllaka) është një bashkësi komplekse qelizash mikrobike të ngulitura në një matricë jashtëqelizore që ngjitet në sipërfaqen e dhëmbëve.

Biofilmi është faktori kryesor etiologjik i shfaqjes së kariesit dhe sëmundjeve periodontale. Mjetet e kontrollit të pllakës përfshijnë metoda mekanike (larje me furçë dhe pastrim me fill dentar) dhe përdorimin e kimikateve (pastë dhëmbësh dhe shpëlarës goje).

Por, edhe aftësitë manuale subjektive mund të ndikojnë në higjienën orale të pacientëve.

Tipologjia e kërkimit dhe modaliteti i analizës

Në një studim klinik, të botuar në Journal of Dental Hygiene, autorët hetuan rolin e aftësisë manuale subjektive në efektet gengivale te disa vullnetarë.

Në këtë studim të verbër, me përzgjedhje rastësore, me katër trajtime dhe me grupe paralele, u mat lidhja midis rezultateve të aftësive manuale subjektive, siç vlerësohet nga Testi Purdue Pegboard (PPT) dhe efektet gengivale të marra pas regjimeve të ndryshme mekanike dhe kimike të higjienës orale për 12 javë.

Në fillim, vullnetarë të rritur të shëndetshëm me prova të gengivitit u vlerësuan për aftësitë e tyre manuale dhe u ekzaminuan për pllakë, gengivit dhe gjakderdhje.

Pas profilaksisë dentare, pjesëmarrësit u ndanë rastësisht në katër grupe trajtimi:

Grupi 1, ku subjektet kryen vetëm brushing (BO) për 12 javë;
Grupi 2, ku subjektet kryen larje dhe shpëlarje me shpëlarës goje (BR) për 12 javë;
Grupi 3, ku subjektet kryen larje me furçë dhe pastrim me fill dentar (BF) për 12 javë;
Grupi 4, ku subjektet kryen larje, pastrim me fill dentar dhe shpëlarje me shpëlarës goje (BFR) për 12 javë.

Në grupet që përdorën fill dentar, subjektet morën udhëzime se si ta përdorin atë në mënyrë korrekte. PPT-ja u përdor për të vlerësuar aftësitë manuale. Mbikëqyrja virtuale u kërkua vetëm një herë në javë. Regjimi i higjienës orale ishte i pambikëqyrur në mbrëmje dhe në fundjavë.

Rezultatet

Nga 213 subjektet e regjistruara, 209 e përfunduan studimin. Pati përmirësime nga fillimi deri në javën e 12 në përqindjen e vendeve të shëndetshme pa gjakderdhje (Expanded Bleeding Index-EBI=0 dhe Modified Gengival Index-MGI=0 ose 1) interproksimal në korrelacion me shkallën e aftësive manuale të pjesëmarrësve.

Pjesëmarrësit me rezultatet më të ulëta të aftësive manuale (9 ose më të ulët) në grupin e trajtimit BFR demonstruan përmirësimin më të madh ndërproksimal bazuar në indekset EBI dhe MGI. Subjektet e grupit të testit me rezultate të aftësive manuale 9 ose më të ulëta kishin ndryshim të kufizuar në përmirësimin ndërproksimal. U gjet një korrelacion i drejtpërdrejtë midis rezultateve të efikasitetit të fillit dentar dhe aftësive manuale.

Konkluzionet

Nga të dhënat e këtij studimi, të cilat duhen konfirmuar edhe në punime të tjera të ngjashme, mund të konkludohet se më pak aftësi manuale mund të kufizojnë efektivitetin e fillit dentar. Shtimi i një shpëlarësi goje me vajra esencialë përmirëson shëndetin ndërproksimal të gengivave dhe zbut aftësitë e ndryshueshme manuale.

Implikimet klinike

Përdorimi i fillit dentar është një detyrë e vështirë ditore për pacientët pasi kërkon aftësi manuale funksionale dypalëshe për t'u kryer në mënyrë korrekte. Prandaj është thelbësore t'u japim pacientëve udhëzime të hollësishme se si të përdorin fillin dentar dhe t'i identifikojmë ata me nivele më të ulëta të aftësive manuale dhe t'i këshillojmë të përfitojnë nga shtimi i një shpëlarësi goje me bazë vaji esencial, përveç larjes së dhëmbëve dhe përdorimit të fillit dentar.

Për më shumë informacion:
Kimberly Milleman, Jeffery Milleman, Mary Lynn Bosma, James A. McGuire, Anusha Sunkara, Alicia DelSasso, Tori York, Angela M. Cecil. Role of manual dexterity on mechanical and chemotherapeutic oral hygiene regimens. J Dent Hyg giugno 2022;96(3):35-45.