Vendosja e një piercing-u oral mund të dëmtojë dhëmbët dhe gengivat

"Studimi ynë zbuloi se shumë njerëz që kanë piercing në gjuhë, kishin xhepa të thellë, hapësira të zbrazëta rreth dhëmbëve dhe gengiva të gjakosura", tha autori i studimit, profesor Clemens Walter (Universiteti Mjekësor i Greifswald, Gjermani).

"Të gjitha këto janë shenja të periodontitit, të quajtur ndryshe edhe sëmundje e gengivave, të cilat mund të çojnë deri në humbjen e dhëmbëve. Njerëzit me piercing në gjuhë dhe buzë duhet t'i heqin ato për të mbrojtur dhëmbët dhe gengivat e tyre nga dëmtimi i mëtejshëm", thotë autori.

Është vlerësuar se rreth 5% e të rriturve të rinj kanë piercing oral, pjesa më e madhe e tyre në gjuhë.

Gratë kanë rreth katër herë më shumë mundësi të kenë një piercing oral krahasuar me burrat.

Rishikimi sistematik i paraqitur mblodhi provat e disponueshme mbi marrëdhënien midis vendosjes së piercing-ut dhe shëndetit oral duke përfshirë tetë studime me 408 pjesëmarrës për një total prej 236 piercing të vendosur në buzë dhe 236 piercing të vendosur në gjuhë. Një e pesta e pacientëve kishin më shumë se një piercing në më shumë se një vend oral.

Vendosja e piercing, përgjithësisht prej metali, varionte nga një muaj deri në 19 vjet.

Studimet krahasuan gjendjen e dhëmbëve dhe gengivave pranë piercing-ve me dhëmbët dhe gengivat në zona të tjera të gojës.

Kur bëhet fjalë për piercing në gjuhë, tre nga pesë studime gjetën xhepa më të thellë rreth dhëmbëve pranë piercing-ut, ndërsa tre nga katër studime nxorrën ne pah hapësira më të mëdha boshe. Të katër studimet që shikuan pacientët për recesion të gengivave gjetën këtë problem tek ata me piercing në gjuhë, ndërsa dy nga tre studime gjetën gjakderdhje të mishrave të dhëmbëve.

Për sa i përket piercing-ut në buzë, prova kryesore ishte recesioni i gengivave, i cili u vu re në tre nga katër studime.

"Rezultatet sugjerojnë se piercing-u oral, veçanërisht ai lingual, ndikojnë negativisht te dhëmbët dhe gengivat ngjitur me të. Në subjektet me piercing lingual, dëmtimi ishte veçanërisht i dukshëm rreth dy dhëmbëve të përparmë të poshtëm, incizivët e mandibulës, të cilët janë të rëndësishëm për kafshimin dhe përtypjen e ushqimit. Mundësitë e dëmtimit të dhëmbëve dhe gengivave duket se rriten me kalimin e kohës".