Impakti ekonomik i Covid-19 te klinikat dentare gjermane

Nga Lara Figini

Gjatë pandemisë nga Covid-19 qeveritë në të gjithë botën kanë implementuar politika rigoroze për ta ndaluar përhapjen, të bazuara kryesisht në distancimin fizik dhe duke futur karantinimin.
Reduktimi i forcuar i aktivitetit ka sjellë dhe do të sjellë ende dëme ekonomike të mëdha. Por cili ka qenë impakti në klinikat dentare?

Tipologjia e kërkimit dhe modaliteti i analizës
Në një studim gjerman të publikuar në Journal of Dentistry në gusht 2020, autorët kanë vlerësuar impaktin ekonomik të këtyre politikave të "frenimit të pandemisë" duke krahasuar klinikat dentare në Gjermani.
Janë identifikuar dy skenarë: sasi e ulët e punës, personel i pakët, kosto të ulëta (skenari S1) dhe sasi e lartë e punës, personel i shumtë, kosto të larta (skenari S2). Janë vlerësuar kostot e çdo klinike dentare të ndara sipas fushës (personeli, materiale, laboratorike dhe të tjera). Nga 24 marsi deri në 2 prill 2020 është kryer një sondazh telefonik mbi një kampion të rastësishëm me 300 dentistë gjermanë (janë përgjigjur 146) për të përcaktuar ndryshimet që kanë ndodhur për shërbimet stomatologjike në këtë periudhë.
Është ndërtuar një model Markov, për një total prej 365 ditësh. Janë hetuar periudha të ndryshme të kufizimeve për Covid-19 (90 ditë: rast-bazë, 45, 135 ditë: analiza e ndjeshmërisë). Është kryer mikro-simulimi Monte-Carlo dhe pasiguria është futur nëpërmjet analizës së ndjeshmërisë probabilistike dhe univariate.

Rezultate
Kufizimet për shkak të pandemisë nga Covid-19 në fushën stomatologjike kanë sjellë një reduktim në kryerjen e shërbimeve në të gjitha fushat, kryesisht tek ato parandaluese (-80% mesatarisht), në periodontologji (-76%) dhe në protetikë (-70%). Në bazë të këtij sondazhi, konsulencat, trajtimet e emergjencës dhe ato endodontike janë reduktuar me 41%, konservativa me 32% dhe kirurgjia orale me 48%.
Kur kufizimet kanë zgjatur për 135 ditë, hyrjet kompleksive janë zvogëluar, respektivisht, në 31%, 30% në S1/S2. Në këtë rast, 29% dhe 12% (S1/S2, respektivisht) do të kishin një neto të dobishme negative përgjatë vitit.

Konkluzione
Nga të dhënat e këtij studimi, mund të dalim në përfundimin se sa më gjatë të mbahen masat kufizuese për shkak të Covid-19, aq më e madhe është vështirësia financiare për klinikat dentare, sidomos për ato me kosto më të larta dhe me punë më shumë. Pas 135 ditësh me masa kufizuese 29% e klinikave me modelin S1dhe 12% e klinikave me modelin S2 nuk arrijnë të mbulojnë më kostot me punën e tyre.

Implikime klinike
Përgjegjësit shëndetësorë duhet të konsiderojnë mbështetjen financiarisht të klinikave dentare gjatë epidemive/pandemive në të cilat zbatohen politikat kufizuese për kontrollin e infeksioneve. Për shembull, mund të merret në konsideratë riorganizimi praktik për të reduktuar kostot dhe për të garantuar të paktën përfitimet minimale.

Për më shumë informacione:
Schwendicke F, Krois J, Gomez J. Impact of SARS-CoV2 (Covid-19) on dental practices: economic analysis. J Dent 2020 Aug;99:103387.

Përktheu: Valbona Spahia