Një studim krahasues mbi florën bakteriale përreth implanteve

Nga Lara Figini

Të shumtë janë faktorët që përcaktojnë suksesin ose dështimin afatgjatë të implanteve dentare dhe një prej tyre është kontaminimi bakterial.
Dihet shumë pak mbi rëndësinë e popullsive bakteriale mbi dhe nën gingivare përreth implanteve apo nëse ka diferenca në mikroflorën peri-implantare ndërmjet implanteve të vendosura menjëherë (direkt pas ekstraksionit të dhëmbit) dhe atyre të vonshme (që vendosen pas pritjes për shërimin kockor pas ekstraksionit).

Tipologjia e kërkimit dhe modaliteti i analizës
Në një studim in vivo, të publikuar në Journal of Dental Implant nga janari në qershor të 2020, autorët kanë analizuar florën mikrobiale që gjendet në zgavrën orale përpara pozicionimit të implanteve dhe gjatë fazave të shumta të trajtimit implantar qoftë për implantet e menjëhershme qoftë për ato të vonuara. Kampionet e pllakës mbigingivare janë grumbulluar dhe janë analizuar në të gjitha rastet.
Pikat e letrës së zhytur në pllakën mbigingivare janë futur në provëza sterile të mbushura me 1 ml gjysmë anaerobe dhe janë dërguar në laborator.
Terrenet e kulturës bakteriale që janë përdorur në studim ishin: agar gjaku, agar gjak-kanamicinë dhe agar gjak-kanamicinë-vankomicinë.

Kampionet mikrobiologjike që janë marrë ishin:
-pre-operativë (përpara regjimit antibiotik) (S1);
-1 ditë pas fazës së parë kirurgjikale (S2);
-kur janë hequr suturat (7-10 ditë pas ndërhyrjes) (S3);
-2 javë më pas (S4);
-në fazën e dytë kirurgjikale (S5);
-dy ditë pas lidhjes së abutmentit (S6);
-ditën e vendosjes së protezës (S7);
-2 ditë pas pozicionimit të protezës (S8);
-në takimin pas 1 muaji (follow up) (S9);
-në takimin pas 2 muajsh (S10).

Kampionet e grumbulluara janë testuar për të vlerësuar rritjen e mikroorganizmave të mëposhtëm:
Streptococcus, Aggregatibacter actinomycetemcomitans, Porphyromonas gingivalis, Prevotella intermedia dhe Fusobacterium nucleatum.

Rezultate
Streptokokët, që janë "banues" normalë në zgavrën orale janë observuar në mënyrë konstante në numra më të larta (36% në implantet e vonshme dhe 35% tek ata të menjëhershëm në krahasim me pjesën tjetër të florës bakteriale), ndërsa organizmat e tjerë si P. gingivalis (21% tek implantet e vonshme, 22% tek ata të menjëhershëm), Fusobacterium (25% vs 24%), P. intermedia dhe A. actinomycetemcomitans kanë treguar numra në mënyrë të krahasueshme inferiorë, qoftë në rastin e implanteve të menjëhershëm qoftë në rastin e implanteve të vonuar. Është parë një prani e rëndësishme e organizmave si Porphyromonas gingivalis dhe Fusobacterium, që kanë një potencial patogjen.

Konkluzione
Nga të dhënat e këtij studimi, që duhet të konfirmohen me punime të tjera analoge, mund të dalim në konkluzionin se modaliteti i inserimit të implantit, i menjëhershëm apo i vonuar, nuk ndryshon mikroflorën peri-implantare. Mikroorganizmat e pranishëm përpara ndërhyrjes janë prezent në mënyrë konstante gjatë të gjithë fazës së trajtimit.

Implikime klinike
Ky studim sugjeron edhe që një vlerësim mikrobial i rregullt së bashku me monitorimin klinik dhe radiografik mund të ndihmojë në njohjen e potencialit të peri-implantitit dhe parandalimin e tij për një prognozë më të mirë.

Për më tepër:
Hiremath KG, Patil VN, Ruttonji Z, Kusugal P, Sushma KM, Astagi P. A comparative evaluation of changes in microbial flora in delayed and immediate placed implants: an in vivo study. J Dental Implants January-June 2020;10(1):16-22

Përktheu: Valbona Spahia