Mikrobioma orale dhe hemikrania, një lidhje befasuese

Një studim ka treguar për herë të parë një lidhje të mundshme midis baktereve të pranishme në kavitetin oral dhe hemirakranias. Këtë studim e ka kryer Antonio Gonzales i School of Medicine në Universitetin e Kalifornisë në San Diego, i cili thotë se ka thelluar çështjen pasi ka vënë re që gruaja e tij kishte dhimbje koke sa herë që hante hamburger ose sallame, ushqime të pasura me nitrate.

Deri këtu nuk patëm asgjë të re sepse është vëzhguar disa herë më parë që përbërjet që kanë në përmbajtje nitrate mund të shkaktojnë dhimbje koke. Shpesh të përdorur si aditivë te mishrat e përpunuar, nitratet janë të pranishme edhe në disa zarzavate si dhe në disa lloje barnash që janë për sëmundjet kardiovaskulare dhe në fakt, rreth 10% e pacientëve nuk i tolerojnë këto terapi vetëm për shkak të intensitetit të dhimbjes së kokës që i shoqëron. Dhimbja e kokës që vjen si pasojë e nitrateve manifestohet tipikisht me dy mënyra të ndryshme, ose shkaktohen menjëherë me intensitet të lehtë apo të moderuar, ose pas disa orësh dhe është shumë më e fortë: në këtë rast, intensiteti i simptomave varet nga doza dhe janë më të ekspozuar individët që kanë një histori individuale ose familjare me hemikrania. Literatura sugjeron që dhimbjet e menjëhershme të kokës dhe ato të vonuara shkaktohen nga dy mekanizma të ndryshëm, por të dy lidhen me praninë e oksidit nitrik, që për më tepër është një molekulë strategjike për sistemet antioksiduese të organizmit.

Rëndësia e studimit të Gonzales qëndron në zbulimin e rolit të baktereve orale: disa nga këto janë në gjendje të konvertojnë nitratet në nitrite, këto të fundit prodhojnë oksidin nitrik me një efekt vazodilatacioni që, tek individët e predispozuar përkthehet në dhimbje koke.
Kërkuesit kalifornianë kanë analizuar mikrobiomën intestinale dhe atë orale të pacientëve që kishin shfaqur hemikrania pas marrjes së nitrateve, duke i krahasuar me atë të pjesëmarrësve që nuk e kishin këtë simptomë. Krahasimi i kampioneve fekale nuk ka evidentuar diferenca të veçanta në përbërjen e mikrobiomave, ndërsa te kampionet orale të individëve me hemikrania ishin më të pranishëm gjene që kodifikojnë nitratet, nitritet dhe enzimat që favorizojnë reduktimin e oksidit nitrik. Rezultati është në linjë me pohimin e dy paradigmave që janë bërë gjithnjë e më evidente nga kërkimet: rëndësia e mikrobiomës dhe lidhja e kushteve të zgavrës orale me ato sistemike.

Adelmo Calatroni

Përktheu: Valbona Spahia