Koronavirus: kujdes sytë

Cilët instrumente duhen përshtatur dhe cilat indikacione. Prof. Azzolini: nëpërmjet syve mund të infektohen profesionistët

Sesi transmetohet COVID-19 nga një person te tjetri nëpërmjet rrugëve respiratore tashmë është një informacion i njohur, pasi këto mikro spërkla të pështymës qëndrojnë në ajër bashkë me virusin përreth gjysmë ore duke infektuar kështu personat e tjerë dhe e dimë edhe që risqet shtohen me përdorimin e shërbimeve stomatologjike që shkaktojnë aerosol.

Punime të fundit shkencore kanë treguar jo vetëm sesi mund të përhapet virusi me anë të lotëve por edhe sesi sytë janë një "derë" e mundshme që lejon virusin të futet dhe të infektojë qelizat e individit për shkak të një proteine të rëndësishme që përdoret nga virusi për t'u lidhur me qelizat që janë në sy.
"Filmi i lotëve, i formuar nga lloje të ndryshme gjëndrash të lotëve, përbëhet nga tre shtresa që lagin syrin duke pasur një funksion mbrojtës, lubrifikues, pastrues dhe ushqyes për syrin," - shpjegon prof. Claudio Azzolini, Profesor për Sëmundjet e Aparatit Të Shikimit, Departamenti i Mjekësisë dhe Kirurgjisë në Universitetin Insubria, Varese - Como, autor edhe i vëllimit "Occhi come prendersene cura" të botuar nga EDRA.
"Lotët më pas përcillen, nëpërmjet kanaleve të vogla të vendosura në pjesën e brendshme të qepallave, në hundë dhe në fyt. Nëse spërklat e infektuara të vaporizuara në ajër bien në sy më pas mund të kalojnë me lehtësi në rrugët respiratore duke provokuar infektimin. Kjo ndodh pa provokuar domosdoshmërisht një konjuktivit."

Për këtë arsye është e nevojshme që profesionisti të mbrojë gjithmonë rrugët e ajrit me një maskë higjienike apo kirurgjikale njëpërdorimshe, por të mbrojë edhe sytë me syze ose për një mbrojtje më të sigurt kundër spërklave të materialeve organike apo pështymës të përdorë mbrojtëset e fytyrës.
"Këto," - këshillon prof Azzolini, - "duhet të jenë me materiale që nuk peshojnë shumë dhe të kenë një pikë të përshtatshme mbështetjeje në hundë si edhe llastiqet me gjatësinë e duhur në mënyrë që të përshtaten sa më mirë me fytyrën duke qenë se do të përdoren për shumë kohë. Lentet normale të shikimit mund të ofrojnë një farë mbrojtjeje por sigurisht ajo është minimale."
Pajisjet për mbrojtjen e syve që rekomandohen në këtë fazë të dytë janë: syzet që kapen me llastiqe dhe mbrojtëset e fytyrës.

Syzet që kapen me llastiqe ose që janë në formë maske indikohet se duhen përdorur gjatë vizitave të pacientëve që nuk janë të dyshuar/të konfirmuar; gjatë manovrave të pastrimit të ambienteve ose gjatë fazave të larjes dhe dezinfektimit të pajisjeve të punës ose pajisjeve që do të përdoren përsëri; gjatë fazave administrative kur nuk është e mundur që të ruhet distanca prej një metri ndëmjet operatorëve.
Mbrojtëset e fytyrës duhen përdorur çdo herë që parashikohet prodhimi i aerosolit pasi mbrojnë të gjithë fytyrën duke paraqitur kështu një ndihmë të vlefshme për të shtuar mbrojtjen ndaj profesionistit. Për më tepër mbrojtësja e fytyrës parandalon kontaktet e pavullnetshme të fytyrës me duar (si për shembull, për të rregulluar syzet apo maskën gjatë seancave të trajtimit), të cilat përcaktojnë një risk më të madh të infektimit të profesionistit.
Për pajisjet mbrojtëse të syve rekomandohet dezinfektimi në fund të trajtimit të çdo pacienti, pasi siç e dimë virusi mund të qëndrojë në sipërfaqe të ndryshme, si çeliku apo plastika, për shumë orë.

Përktheu: Valbona Spahia