Individët që vuajnë nga diabeti dhe Koronavirusi: rëndësia e shëndetit oral

Shoqata spanjolle e diabetit (SED) dhe Shoqata spanjolle e periodontologjisë kanë kthyer vëmendjen nga të sëmurët me diabet dhe risqet që ata kanë në këtë periudhë pandemie. Rekomandohet një higjienë orale maksimale!

Lorena Origo

Për personat e prekur nga diabeti, një asistencë orale optimale është një zakon thelbësor, edhe më i rëndësishëm në këtë moment kur është e pranishme pandemia e Koronavirusit. Një higjienë orale e saktë, si edhe një ndërhyrje e shpejtë dhe efikase për të parandaluar ose kuruar shqetësimet gingivale, ndihmon në parandalimin dhe/ose kontrollin e çrregullimeve inflamatore (si periodontiti) që e kanë origjinën në gojë por kanë ndikim edhe në shëndetin gjeneral dhe që përgjithsësisht ndryshojnë kontrollin glicemik të personave me diabet.

Në rastin e zhvillimit të COVID-19, individët diabetikë kanë një risk më të madh në krahasim me popullsinë e përgjithshme, për progresion të sëmundjes dhe për komplikacione të rënda (duke përfshirë edhe humbjen e jetës). Veçanërisht, pesë milionë diabetikët që janë vlerësuar në Spanjë, ku 40% e tyre ishin edhe mbi 65 vjeç, që përbën një tjetër faktor të rëndësishëm për riskun ndaj një prognoze negative përballë këtij infeksioni viral.
Këto të dhëna janë paraqitur nga grupi i punës "Diabeti dhe sëmundjet periodontale", që përbëhet nga ekspertë të Shoqatës spanjolle për Diabetin (SED) dhe Shoqatës spanjolle për periodontologjinë (SEPA), që nënvizojnë se: "Personat me diabet janë një grup në risk të lartë në situatën në të cilën ndodhemi dhe ndaj përveç vëmendjes që i duhet kushtuar personave në përgjithësi gjatë kësaj periudhe, duhet të përshtatim edhe masa ekstreme të higjienës dentare dhe interdentare, duke përfshirë edhe përdorimin e antiseptikëve oralë."
Për të njëjtën arsye, këshillohet që individët me diabet të mos e shtyjnë vizitën te dentisti në rast se e kanë të nevojshme. Nëse kemi të bëjmë me një infeksion periodontal, gjakrrjedhje gingivale të konsiderueshme, qelbëzim apo abscese periodontale, këshillohet që të kontaktohet dentisti menjëherë dhe të vlerësohen nëse nevojitet një trajtim periodontal urgjent", - rekomandon periodontologia e grupit të punës, Cristina Serrano Sánchez-Rey.

Një grup në risk
Siç është përshkruar nga komponentët e grupit të punës, ka arsye të ndryshme përse pacienti me diabet duhet të izolohet dhe të kujdeset më shumë për veten.
Personi me diabet ka një sistem imunitar të dëmtuar, që i përgjigjet infeksioneve në mënyrë të papërshtatshme, qofshin ato bakteriale, fungale ose virale. Në rastin e Koronavirusit, kjo e lehtëson përhapjen e tij në mushkëri, kundrejt të cilit sistemi imunitar do të përpiqet të rezistojë. Kjo luftë bazohet në lëshimin e sasive të mëdha të citokinave proinflamatore, substanca që kanë si mision të çrrënjosin virusin, por që në mënyrë kolaterale prodhojnë një situatë inflamacioni jo vetëm në nivel pulmonar por të gjeneralizuar. Kjo rritje e markerave inflamatorë në gjak është përgjegjëse për prodhimin e insulino-rezistencës dhe si pasojë e një rritjeje më të madhe të niveleve të hemoglobinës së glikuar.

Prandaj, COVID-19 te një pacient me diabet mund të shtojë në mënyrë të konsiderueshme riskun e glicemisë së pakontrolluar, me komplikacionet pasuese. Nga ana tjetër, disa nga trajtimet e përdorura te pacientët me COVID-19 (si për shembull, kortokosteroidet me doza të larta) shkaktojnë edhe një shtim të presionit të gjakut dhe të niveleve të hemoglobinës së glikuar, që mund edhe të kontrollojë diabetin.
Një nga komplikacionet e observuara te pacientët me COVID-19 është ai kardiovaskular, pasojë qoftë e infeksionit viral qoftë e trajtimeve të përdorura kundër tij (si në rastin e antimalarikëve, si klorokina). Prandaj shumë pacientë me diabet, veçanërisht ata më të moshuar, kanë tashmë komplikacione kardiovaskulare, duke shtuar kështu më tej riskun për përkeqësim të sëmundjes diabetike.

Përktheu: Valbona Spahia