Prevalenca e kariesit dentar te fëmijët dhe adoleshentët me diabet të tipit 1

Lara Figini

Diabeti melit i tipit 1 është një sëmundje kronike autoimune që karakterizohet nga shkatërrimi i qelizave pankreatike beta dhe si pasojë nga mungesa e prodhimit të insulinës. Ky lloj diabeti prek mbi gjysmë milion fëmijë në të gjithë botën dhe prevalenca e incidenca e tij është në rritje, veçanërisht në Evropë.
Studime të shumta epidemiologjike kanë raportuar se diabeti i tipit 1 shton riskun e sëmundjes kardiovaskulare, sëmundjes së veshkave dhe rënies konjitive te fëmijët dhe adoleshentët. Për më tepër, një numër në rritje i studimeve indikon një lidhje ndërmjet diabetit të tipit 1 dhe komplikacioneve orale, duke përfshirë sëmundjet periodontale dhe kariesin dentar.
Studimet që janë aktualisht të disponueshme në literaturë, që vendosin prevalencën e saktë të kariesit dentar ndërmjet fëmijëve dhe adoleshentëve me diabet të tipit 1 janë për fat të keq të diskutueshme dhe nuk ka meta-analiza sasiore në lidhje me këtë.

Materiale dhe metoda
Në një rishikim sistematik, të publikuar në BMC Oral Health, në shtator 2019, autorët kanë kryer një kërkim biobliografik të gjerë, të bazuar në një strategji të paracaktuar kërkimi,me PubMed, EMBASE and China National Knowledge, për të gjitha studimet që kanë prevalencë të kariesit dentar te fëmijët dhe adoleshentët me diabet të tipit 1 të publikuar nga korriku 1971 deri në dhjetor 2018.
Prevalenca e grumbulluar me 95% intervale besueshmërie (95%CIs) dhe analizat e nëngrupeve janë llogaritur duke përdorur një model efektesh të rastësishme.

Rezultate
Nga 358 artikuj që janë identifikuar fillimisht, një total prej 10 artikujsh që përfshinin 538 pacientë u përfshinë në rishikimin përfundimtar. Prevalenca e përgjithshme e kariesit dentar ndërmjet fëmijëve dhe adoleshentëve me diabet të tipit 1 ishte 67%.
Prevalenca ishte më e lartë në Amerikën Jugore (84%) dhe më e ulët te pacientët diabetikë me kontroll të mirë metabolik (47%).

Konkluzione
Nga të dhënat e këtij rishikimi, që duhet të konfirmohen me rishikime të tjera të ngjashme, mund të dalim në përfundimin që prevalenca e kariesit dentar është e lartë te fëmijët dhe adoleshentët me dibet të tipit 1. Duke parë prevalencën e lartë të kariesit dentar ndërmjet të rinjve me diabet të tipit 1, skrinimi dhe trajtimi parandalues duhet të përfshihen në mënyrë rutinore si trajtime në klinikat dentare për fëmijët e adoleshentët diabetikë, veçanërisht ata me kontroll të dobët metabolik.

Për më tepër: Prevalence of dental caries in children and adolescents with type 1 diabetes: a systematic review and meta-analysis.

Përktheu: Valbona Spahia